Երեւանի քաղաքապետարանը սկսել է 20 վերելակների փոխարինման գործընթացը
Երեւանի քաղաքապետարանը սկսել է վերելակների փոխարինման գործընթացը: Մայրաքաղաքում փոխարինման ենթակա շուրջ 3500 վերելակ կա: Փորձնական ծրագրով այս օրերին տեղադրվում է առաջին 20-ը:
«Մենք դեռեւս 2018թ. քաղաքապետի հետ բավական երկար քննարկում էինք, թե վերելակների ծավալուն նախագիծը ինչպես սկսենք, որտեղից սկսենք: Նախընտրական ծրագրի կարեւոր դրույթներից մեկն էր: Ի սկզբանե պարզ էր, որ նախագիծը շատ ծավալուն է, եւ գործ ունենք Երեւանի բնակչության մեծամասնության հետ, իրենց շահերի հետ: Լավագույն տարբերակն ընտրվեց նախնական որոշակի քանակի նույն՝ թե ֆինանսական, թե տեխնիկական մոդելով վերելակների տեղադրում՝ համայնքի միջոցների հաշվին»,- նշում է Երեւանի քաղաքապետի տեղակալ Հայկ Սարգսյանը:
20 վերելակ՝ 10 վարչական շրջաններում: Այս պահին իրականացվում է հին վերելակների ապամոնտաժումը:
«Մրցույթներն արդեն կայացել են, պայմանագրերը կնքված են, վերելակների մատակարարումն սկսված է: 12 վերելակ մատակարարներն արդեն ներկրել են, եւս 8-ը ճանապարհին է»,- նշում է Հայկ Սարգսյանը:
Փորձնական ծրագրի արժեքը 20 վերելակների համար շուրջ 190 մլն դրամ է: Այն իրականացվում է ամբողջական նախագծով: Շենքերն ընտրվել են՝ հաշվի առնելով վերելակների դետալների մաշվածությունը, խափանման հաճախականությունը, հորանների վիճակը, խցիկների մաշվածության աստիճանն ու ԱԻՆ-ի կողմից հաստատված մի շարք այլ չափորոշիչներ: Երեւանում գործող վերելակների գրեթե 70 տոկոսը շահագործվում է ավելի քան 40 տարի, այնինչ դրանք 25 տարի հետո պետք է փոխարինվեին:
«Բազմաբնակարան շենքի կառավարման մասին» օրենքով վերելակն ընդհանուր բաժնային սեփականության իրավունքով պատկանում է բնակարանների սեփականատերերին, այսինքն՝ բնակիչներին: Խնդրի սոցիալական նշանակությունն ու քաղաքացիների անվտանգությունը երաշխավորելու անհրաժեշտությունն ստիպեց համայնքային իշխանությանը նախաձեռնել ծրագրի իրագործումը:
«Ծրագիրը մեծ օգնություն է թե՛ համատիրությանը, թե՛ սեփականատերերին: Համատիրությունն ի վիճակի չէր դա իր ուժերով անելու»,- ասում է «Արգիշտի» համատիրության կառավարիչ Շուշան Քալանթարյանը:
Ամբողջական նախագծի իրագործումը, խոսքը շուրջ 3500 վերելակների մասին է, քաղաքապետարանը նախատեսում է իրականացնել համայնք-բնակիչ համագործակցությամբ:
«Ֆոնդի ամբողջական փոխարինումը կատարվելու է փոխառու միջոցների հաշվին, եւ դրանք պետք է մարվեն տարիների ընթացքում: Վճարները կավելանան ոչ էականորեն՝ համեմատած այն ծառայության ու ապրանքի հետ, որ կստանա բնակիչը: Խոսքը կարող է լինել առավելագույնը 30-40%-ի մասին: Որպեսզի մոդելի, այսպես ասած, «իդենտիկությունը» պահպանենք, նույն վճարների գանձման մեխանիզմը կկիրառենք: Այդ վճարները կգանձվեն, բայց համայնքը չի վերցնի այդ գումարը, այլ այն կտրամադրենք տվյալ շենքը սպասարկող համատիրությանը»,- ընդգծում է Երեւանի փոխքաղաքապետը:
Հայկ Սարգսյանի խոսքով՝ վերելակների փոխարինման ծրագրի տեխնիկական բնութագրում, որպես պարտադիր պահանջ, մի շարք չափորոշիչներ են սահմանվել. «Մենք տեխնիկական բնութագրերում խստորեն ներառեցինք դրանց ներառականության բաղադրիչները, ընդ որում, կուրություն ունեցող անձանց համար ընթեռնելի սեղմակների տառատեսակները, ձայնային համակարգը, անվտանգության կանչի համակարգը, ինչպես նաեւ սեղմակների համապատասխան բարձրության ապահովումը, որպեսզի դրանից կարողանան օգտվել նաեւ սայլակով մարդիկ, դռների բացվածքը նույնպես աշխատել ենք, որ այդ սահմանաչափում լինի»:
20 վերելակների տեղադրումն ամբողջությամբ կավարտվի մինչեւ տարեվերջ: Մինչ ամբողջական նախագծի մեկնարկը՝ Երեւանի քաղաքապետարանը 2020թ. նախատեսում է վթարավտանգ եւս 100 վերելակի փոխարինում: Միջոցները նախատեսվելու են հաջորդ տարվա բյուջեով: