Փաշինյանի վարկանիշը եւ իրականությունը
Մամուլի որոշ հրապարակումների համաձայն, գաղտնի հարցումները ցույց են տալիս, որ Նիկոլ Փաշինյանի վարկանիշը մոտ 21-23 տոկոս է, ինչը խիստ անհանգստացրել է գործող վարչապետին:
Նույնիսկ առանց այս հրապարակումների, վաղուց արդեն ակնհայտ էր, որ արդեն մի քանի ամիս է ինչ Փաշինյանի իրական վարկանիշը հազիվ 25 տոկոս է, ինչը, եթե անկեղծ լինենք, նույնիսկ բարձր ցուցանիշ է, եթե համեմատենք այն, թե ինչ ր նա խոստանում, եւ թե ինչ վիճակ է այժմ մեր երկրում:
Անկեղծ լինենք, հաջողակ պետք է լինես, եթե ժողովրդին բանկերի տոկոսներից ազատելու խոստումից հետո առանձնատունդ 200 հազար դոլարով նորոգես եւ ունենաս 25 տոկոս աջակիցներ, պետք է լուսավոր աստղի տակ ծնված լինես, եթե ժողովրդին խոստանում էիր կենսամակարդակի աճ, բայց դրա փոխարեն 55 միլիոն դոլարանոց կամ նույնիսկ ավելի գնով կառավարական նոր օդանավ ես ուզում գնել, իսկ վարկանիշդ 21-23 տոկոսի սահմաններում է:
Ասում են, թե իբր Փաշինյանն այս թվերից նեղսրտել է: Եթե այդպես է, ապա Փաշինյանին իսկապես խաբում են, երբ ներկայացնում են իրական պատկերն ու ժողովրդի տրամադրությունը կամ ֆեյսբուքյան հարյուր հազարավոր ֆեյքերը խաբում են նաեւ գործող վարչապետին:
Մեկ անգամ եւս շեշտենք, որ ֆեյսբուքյան ֆեյքերը կեղծ իրականություն են ստեղծում, այդ թվում եւ վարչապետի վարկանիշի մասին: Օրինակ, լրատվամիջոցներից մեկի ֆեյսբուքյան այն հրապարակման ներքո, որտեղ նշված էր, թե վարչապետի վարկանիշը 21-23 տոկոս է, միանգամից հավաքվեցին ֆեյքերը եւ սկսեցին վարչապետին աջակցող գրառումներ անել, իսկ սոցհարցման արդյունքները հրապարակողներին հայհոյել, անիծել եւ անգամ սպառնալ:
Իրականում, եթե անկեղծ լինենք, Փաշինյանը պետք է որ անչափ գոհ լինի, որ հարյուր հոգուց 23-25-ը կամ անգամ 21-23-ը շարունակում են աջակցել իրեն: Չէ որ առանձնահատուկ հաջողակ պետք է լինես, որ երկու զարահապատ ավտոմեքենա գնելուց եւ հայերենը բուհերից դուրս մղելուց հետո կարողանաս այսքան մեծ թվով կողմնակիցներ ունենաս:
Այն, որ Փաշինյանի վարկանիշը առաջիկայում ավելի մեծ անկում է ապրելու, փաստ է, դրանից նա չի կարող խուսափել, այնպես, ինչպես դատարկումից չի կարող խուսափել այն ջրավազանը, որի ելքը անհամեմատ մեծ է մուտքից: Երբ տվել ես հազարավոր խոստումներ եւ դրանք ոչ միայն չես անում, այլ զբաղված ես սեփական բարեկեցության, նեղ շրջապատի բարեկեցության հարցեր լուծելով, երբ երկրում մնացել են սիրելի օլիգարխները, երբ տնտեսությունն անկում է գրանցում, երբ խնդիրները ոչ միայն չեն լուծվում, այլ ավելանում են, երբ միակ հպարտանալու փաստը ասֆալտապատումն է, ապա վարկանիշը շատ շուտով լինելու է ոչ թե 21-23, այլ 2,1-2,3, առավելագույնը՝ 2,5 տոկոս:
Վարդան Մխիթարյան
Top-News.am
«Վարչապետ Փաշինյանը վերջերս նորից սկսել է էլ ավելի հաճախակի սելֆիներ, լայվեր և «ժողովրդահաճո» այլ գործողություններ կատարել։
«Փաստ» թերթի տեղեկություններով, ի թիվս այլ հարցերի, պատճառն այն է, որ մոտ 10 օր առաջ վարչապետի սեղանին են դրվել սոցհարցումների թարմ տվյալներ։
Դրանք այնքան են զայրացրել վարչապետին, որ վերջինս հանձնարարել է ստուգել, և նոր հարցում են պատվիրել տեղի սոցիոլոգիական կազմակերպություններից մեկին, որը միջազգային կազմակերպության մասնաճյուղն է Հայաստանում։
Ըստ մեր աղբյուրների, հարցումների տվյալները ներկայացվել են վարչապետի՝ փարիզյան այցից 2 օր առաջ. այդ հարցումներով հաստատվել են նախորդի տվյալները, ըստ որոնց, վարչապետի վարկանիշը տատանվում է մոտ 21-23 %-ի սահմաններում:
Հարցման մեջ եղել են տվյալներ այլ դեմքերի և գործիչների մասով, որոնք ուղղակի զայրացրել են Փաշինյանին, և նա էլ իր հերթին հանձնարարել է իր ամենից վստահելի մարդկանց՝ մտածել, վերլուծել և իրեն ներկայացնել անելիքների ծրագրեր, թե ինչ կարելի է անել՝ կանգնեցնելու վարկանիշի այդչափ արագ անկումը։
Ըստ այդմ, չի բացառվում, որ շուտով վարչապետը նախաձեռնի հանրությանը նոր, էլ ավելի հետաքրքիր տեսարաններով ապահովելու գործողություններ, քանի որ նախկինում արվածներն էլ իրենց նպատակին չեն ծառայում»,-գրում է թերթը: