ՌԴ-ի կողմից Ադրբեջանին զենք մատակարարելու համար նեղանալը «մեղք է». Կալաշնիկով
Ադրբեջանին մատակարարվող զենքի հարց ՀԱՊԿ խորհրդարանական վեհաժողովի խորհրդի նիստին չի քննարկվել, այն խորհրդարանական վեհաժողովի կոմպետենտության շրջանակում չէ: Այս մասին լրագրողների հետ զրույցում փակ նիստից հետո հայտարարեց ՌԴ Պետդումայի՝ ԱՊՀ, Եվրասիական ինտեգրացիայի և հայրենակիցների հետ կապերի կոմիտեի ղեկավար Լեոնիդ Կալաշնիկովը:
«Կան երկրների ղեկավարներ, որոնք, հավանաբար, այս հարցը քննարկում են, բայց ես չեմ կարող զենքի մասին որևէ բան ասել: Այս մասին բազմիցս խոսվել է»,- մանրամասնեց Կալաշնիկովը։ Նա ասաց, որ ՌԴ-ն ոչ միայն Ադրբեջանին է զենք վաճառում, այլև իր բոլոր գործընկերներին, այդ թվում՝ Հայաստանին:
«ՀՀ-ին այնպիսի զինատեսակներ են տրամադրվել, որոնք նախկինում երբեք չեն եղել, այնպես որ, կարծում եմ, այս հարցում ՌԴ-ից զինատեսակների մատակարարման համար նեղանալը «մեղք է»: ՀՀ-ին նաև վաճառվում է այնպիսի զենք, որն այլ երկրներին չի վաճառվում»,-նկատեց նա: