«ՀուԶանք ու Զանգ»-ին չի կարելի մոտենալ որպես մշակույթի, դա փողոցային ինքնադրսևորման տեսակ էր և փողոցային վերաբերմունքի էլ արժանացավ. Վահան Արծրունի
Դա ավելի շատ փողոցային ինքնադրևսևորման մի տեսակ էր, որը համապատասխան փողոցային վերաբերմունքի դրսևորմանն էլ արժանացավ, իր էությանը համարժեք ռեակցիա առաջացրեց, որը շատ օրինաչափ էր և այլ կերպ չէր կարող լինել: Այս մասին Tert.am-ի հետ զրույցում ասաց երգիչ, երգահան ԵՊԲՀ հոգաբարձուների խորհրդի նախագահ Վահան Արծրունին:
«Ենթամշակութային երևույթներն ընդհանրապես իմ տեսադաշտից դուրս են: Խոսել այդ երևույթի մասին՝ որպես մշակութային իրադարձության, չեմ կարող, որովհետև ինքն իր բնույթով, գաղափարով և իրականացման ձևաչափով ենթամշակութային է: Նման իրադարձությանը չի կարելի մոտենալ որպես մշակույթի կամ արվեստի բարձր չափանիշներ ունեցող երևույթի»,- ասաց նա:
Դիտարկմանը՝ ասում են, թե դա արվեստ է, Արծրունին պատասխանեց. «Իրենք ինչ ուզում են, կարող են ասել, ես էլի կմեջբերեմ սկզբում իմ ասածը՝ այն ձևը, որ իրենք տվեցին իրենց ներկայացմանը, այսինքն՝ այդ ներկայացումն առաջարկվեց փողոցային ձևի մեջ, հանրությունն էլ փողոցային ձևով արձագանքեց: Այս պարագայում լրիվ համարժեք և համազոր երկու իրողություն մեկ ենթամշակութային իրողության շուրջ էր. այն փողոցային երևույթ էր, փողոցային լուծում էլ ստացավ»:
Վահան Արծրունին համաձայն չէ այն դիտարկումներին, թե այս ներկայացմամբ ինչ-որ հատուկ քարոզ է տարվում: «Այս ներկայացմանը պետք է մոտենալ հետևյալ չափանիշով՝ որքանո՞վ է երևույթը բովանդակային և որքանո՞վ է ինքը գեղարվեստական, այսինքն կա՞ մեջը բովանդակայնություն և գեղարվեստականություն: Եթե այս երկու չափանիշները բացակայում են, սա արդեն նշանակում է, որ պետք է ուղղակի կողքով անցնել ու ոչ մի խորություն մեջը չփնտրել: Նման իրադարձությունների մեջ նման խորություններ փնտրելը պարզապես մանկամտություն է»,- ասաց նա և առաջարկեց՝ քանի որ հասարակության որոշակի հատված այդ ներկայացման մեջ սատանիզմի տարրեր է գտնում, կրոնական և հակակրոնական քարոզների դեմ այլ տեղ պայքարել, օրինակ, աղանդավորների մոտ, որոնք ամեն օր նման քարոզ են տանում:
Անդրադառնալով ԿԳՄՍ նախարար Արայիկ Հարությունյանի հայտարարությանը, թե մշակույթի մեջ ցենզուրա չի լինելու՝ նա նշեց. «Ճիշտ սկզբունք է, ի՞նչ ցենզուրա մշակույթի դաշտում, բայց եթե իսկապես խոսքը մշակույթի մասին է: Մշակույթի ոլորտում ցենզուրան բացառվում է, բայց արդյո՞ք մենք առնչվում ենք մշակույթի դրսևորման հետ: Ես կրկնեմ սկզբում ասածս թեզը, որ մենք այս պարագայում առնչվում ենք ենթամշակութային երևույթների հետ: Այն չափանիշները որով կարող ենք մոտենալ մշակույթին, այս պարագայում դրանք կիրառելի չեն և չենք կարող այս իրադարձությունն ընդունել որպես մշակութային»,- ասաց նա:
Դիտարկմանն առ այն, թե հայտնի դարձավ, որ պետությունը 20 մլն դրամ է հատկացնելու նախկին ծանրամարտիկ Մելինե Դալուզյանի մասին պատմող «Մել» ֆիլմի նկարահանումների համար, որի շուրջ աղմուկ բարձրացավ, և հարցին՝ ի՞նչ կարծիք ունի այս հատկացման վերաբերյալ, Արծրունին պատասխանեց. «Պետությունը նաև 5 մլն դրամ հատկացրել էր «գորգ լվանալու» համար: Կարծում եմ՝ այս վեկտորը բավականին հստակ է պետության կողմից, ես արդեն չեմ զարմանում և հետագայում էլ չեմ զարմանա, եթե այդ վեկտորով ևս նման փողային հատկացումներ լինեն. նույն շարքում է 100 000 դոլարի հատկացումը վարչապետի՝ «Ժողովուրդն իմ ընտանիքն է, Հայաստանն իմ օջախն է» բաներների՝ ամբողջ Հայաստանով մեկ տարածման այդ անհավանական մեծ բյուջեն: Մենք այստեղ տեսնում ենք պետության կողմից որոշակի հետևողական քաղաքականության դրսևորում»:
Երգահանը նշեց, որ կարծում է՝ այդ գումարները, որ հատկացվում են նման բաներին, կարելի է ծառայեցնել ոչ թե ենթամշակութային երևույթները ցենզուրայի դաշտից դուրս բերելուն, այլ իրապես իրական արվեստը զարգացնելու, մշակութային ավելի արդյունավետ նախագծերին տրամադրելուն:
Դիտարկմանը՝ «ՀուԶանք ու Զանգ» ներկայացումն էլ նախարարության դրամաշնորհով է իրականացվել, նա պատասխանեց.«Ինձ չի զարմացնի, եթե մենք իմանանք, որ այդտեղ էլ մի քանի մլն դրամ հատկացում եղած լինի»:
Ավելի ուշ ԿԳՄՍՆ-ն հայտարարեց, որ ներկայացման համար տրամադրվել է 2.7 մլն դրամ: