Նորմերի շեղումներ են հայտնաբերվել Արարատյան դաշտի գյուղերի խմելու ջրում
ՀՀ առողջապահության եւ աշխատանքի տեսչական մարմինը նորմերի շեղումներ է հայտնաբերել Արմավիրի մարզի Տարոնիկ համայնքի խմելու ջրի 2 նմուշներում եւ Արարատի մարզի Հայանիստ համայնքի խմելու ջրի 6 նմուշներից մեկում, հաղորդում է «ԷկոԼուրը»:
Տեսչական մարմինը պարզել է նաեւ, որ Արմավիրի մարզի Արտաշար համայնքի ջրամատակարարումն ապահովող 2 արտեզյան հորերը չունեն սանիտարական պահպանման գոտիներ: Սայաթ Նովա համայնքում տեսչական մարմինը խնդիրներ չի հայտնաբերել: Այս մասին ԷկոԼուրի հարցմանն ի պատասխան նամակով հայտնել է տեսչական մարմնի ղեկավար Հակոբ Ավագյանը:
Հիշեցնենք, որ ԷկոԼուրը ՀՀ վարչապետ Նիկոլ Փաշինյանին էր ուղարկել նամակ Տարոնիկ, Արտաշար, Հայանիստ եւ Սայաթ Նովա համայնքների բնակիչների ջրի խնդիրների վերաբերյալ, ինչպես նաեւ այդ համայնքների բնակիչների ջրի խախտված իրավունքի վերականգնման 4 դիմում պահանջագիր։
Նամակների հիման վրա ՀՀ առողջապահության եւ աշխատանքի տեսչական մարմինը վարչական վարույթ էր հարուցել համայնքներում, որոնց արդյունքների մասին, մասնավորապես, նշել է.
«ՀՀ առողջապահության եւ աշխատանքի տեսչական մարմնի նախաձեռնությամբ ՀՀ Արարատի մարզի Հայանիստ, Սայաթ Նովա եւ Արմավիրի մարզի Արտաշար, Տարոնիկ համայնքներում հարուցվել են վարչական վարույթներ՝ ՀՀ առողջապահության նախարարի 2002 թվականի դեկտեմբերի 25-ի N 876 հրամանով հաստատված «Խմելու ջուր: Ջրամատակարարման կենտրոնացված համակարգերի խմելու ջրի որակին ներկայացվող հիգիենիկ պահանջներ: Որակի հսկողություն» N 2-III-Ա2-1 եւ 2002 թվականի նոյեմբերի 11-ի N 803 հրամանով հաստատված «Խմելու տնտեսական նշանակության ջրմուղների եւ ջրամատակարարման աղբյուրների սանիտարական պահպանման գոտիներ» N 2-III-Ա2-2 սանիտարական կանոններով եւ նորմերով (այսուհետ՝ Նորմեր) սահմանված պահանջների պահպանումը պարզելու նպատակով, որոնք ուղեկցվել են խմելու նպատակով օգտագործվող ջրի նմուշառումներով՝ ջրի որակի լաբորատոր փորձաքննություն իրականացնելու համար: Լաբորատոր փորձաքննությունն իրականացվել է ՀՀ ԱՆ «Հիվանդությունների վերահսկման եւ կանխարգելման ազգային կենտրոն» ՊՈԱԿ-ի կողմից:
ՀՀ Արմավիրի մարզի Արտաշար համայնք՝ ջրամատակարարումն ապահովող 2 արտեզյան հորերը չունեն սանիտարական պահպանման գոտիներ, ինչը հանդիսանում է N 2-III-Ա2-2 սանիտարական կանոնների եւ նորմերի պահանջների խախտում, որի կապակցությամբ 2019 թվականի օգոստոսի 27-ին տրվել է կարգադրագիր՝ խախտումները վերացնելու համար: Ներկայում սանիտարական պահպանման գոտիների կառուցման աշխատանքներն ընթացքի մեջ են: Վարույթի շրջանակներում լաբորատոր փորձաքննության նպատակով նմուշառված խմելու ջրի 3 նմուշներում մանրէաբանական, ջրի զգայորոշական եւ ջրի աղտոտվածության պատճառի հայտնաբերման ցուցանիշներով շեղումներ չեն հայտնաբերվել: Կարգադրագրով տրված առաջադրանքների կատարված լինելը պարզելու նպատակով նոյեմբեր ամսին նախատեսվում է հարուցել վարչական վարույթ:
Արմավիրի մարզի Տարոնիկ համայնք՝ ջուրը բնակչությանը խմելու նպատակով դեռ չի տրվում, տրվում է օրական 1 ժամ՝ կենցաղային նպատակների համար, բնապահպանության նախարարության կողմից ջրօգտագործման վերաբերյալ թույլտվության բացակայության պատճառով: Վարույթի շրջանակներում լաբորատոր փորձաքննության նպատակով նմուշառված խմելու ջրի 2 նմուշներում մանրէաբանական ցուցանիշներով արձանագրվել են N 2-III-Ա2-1 նորմերի շեղումներ: Հարուցված վարչական վարույթը կարճվել է վարչական իրավախախտման կազմի բացակայության հիմքով:
Արարատի մարզի Սայաթ Նովա համայնք՝ ջրամատակարարումը շուրջօրյա է: Լաբորատոր փորձաքննության նպատակով նմուշառված խմելու ջրի 4 նմուշներում մանրէաբանական շեղումներ չեն արձանագրվել: Քանի որ ջուրն օգտագործվում է եւ ոռոգման նպատակով, այն սպասարկվում է ՋՕԸ-ի կողմից: Սայաթ Նովայի համայնքապետարանը չի հանդիսանում ջրամատակարարման համակարգը շահագործող կազմակերպություն, ուստի հարուցված վարչական վարույթը կարճվել է վարչական իրավախախտման կազմի բացակայության հիմքով:
ՀՀ Արարատի մարզի Հայանիստ համայնք՝ վարույթի շրջանակներում լաբորատոր փորձաքննության նպատակով նմուշառված խմելու ջրի 6 նմուշներից 1-ում մանրէաբանական ցուցանիշներով արձանագրվել են N 2-III-Ա2-1 նորմերի շեղումներ: Հայանիստի համայնքապետարանը չի հանդիսանում ջրամատակարարման համակարգը շահագործող կազմակերպություն եւ հարուցված վարչական վարույթը կարճվել է վարչական իրավախախտման կազմի բացակայության հիմքով:
Միաժամանակ տեղեկացնում ենք, որ ՀՀ տարածքային զարգացման եւ ենթակառուցվածքների նախարարը 2019 թվականի սեպտեմբերի 12-ի N 01/8136-19 գրությամբ տեղեկացվել է վարչական վարույթի ընթացքի մասին, եւ առաջարկվել է տալ հանձնարարական համապատասխան ստորաբաժանումներին՝ ՀՀ առողջապահության եւ աշխատանքի տեսչական մարմնի կողմից բարձրացված հարցերի կարգավորման համար»: