5մլն դրամ, բնակարան, ավտոտնակ. Ինչ ունեցված ունի պատգամավոր Անդրանիկ Քոչարյանը
ArmDaily.am-ը ‹‹Հայտարարագիր›› շարքում այս անգամ կներկայացնի ՀՀ ԱԺ «Իմ քայլը» խմբակցության պատգամավոր, ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի ունեցվածքը։
Ով է Անդրանիկ Քոչարյանը
Անդրանիկ Քոչարյանը ծնվել է 1961 թվականի մայիսի 3-ին։ 1983թ. ավարտել է Երեւանի պետական պոլիտեխնիկական ինստիտուտի կիբեռնետիկայի ֆակուլտետի ավտոմատ կառավարման համակարգեր բաժինը: Ճարտարագետ: 2000թ.՝ Երեւանի պետական համալսարանի իրավաբանական ֆակուլտետը: Իրավաբան:
1983-1990թթ. աշխատել է Երեւանի մաթեմատիկական մեքենաների գիտահետազոտական ինստիտուտի ճարտարագետ: 1990-1991թթ.՝ ՀՀ ներքին գործերի նախարարի առաջին տեղակալ: 1991-1995թթ.՝ ՀՀ պաշտպանության նախարարի առաջին տեղակալ: 1994-1996թթ.՝ Աղետի գոտում կառավարության արտակարգ լիազոր ներկայացուցիչ: 1999-2000թթ.՝ ՀՀ վարչապետի խորհդական պաշտպանության, ազգային անվտանգության, ներքին գործերի եւ կադրային քաղաքականության հարցերով:
2000-2005թթ.՝ «Հասարակությունն ընդդեմ ահաբեկչության» հկ ազգային անվտանգության եւ պաշտպանության գծով անկախ փորձագետ: 2008-2009թթ.՝ Երեւանում 2008թ. մարտի 1-ի իրադարձությունները քննող փաստահավաք խմբի անդամ, փորձագետ: 2012 թվականից «Ժողովրդավարության, անվտանգության եւ զարգացման հայկական կենտրոն» հկ նախագահն է:
1995-1999թթ.՝ ԱԺ պատգամավոր: ԱԺ «Հանրապետություն» խմբակցության անդամ: Անկուսակցական:
2018թ. դեկտեմբերի 9-ին ԱԺ պատգամավոր է ընտրվել «Իմ Քայլը» կուսակցությունների դաշինքի համապետական ընտրական ցուցակով:
2019թ. հունվարի 18-ին ընտրվել է ՀՀ ԱԺ պաշտպանության եւ անվտանգության հարցերի մշտական հանձնաժողովի նախագահ: Անկուսակցական է։
Ամուսնացած է, ունի երեք զավակ:
Նշենք, որ պատգամավորը վերջերս հասարակական ու քաղաքական ուշադրության կենտրոնում հայտնվեց՝ ՀՀ նախկին պատգամավոր ու Արդարադատության նախկին նախարար Արփինե Հովհաննիսյանի հասցեին անձնական հայտարարություն անելու համար։
Ունեցվածքը
Քոչարյանը հաշվառված է Երևան քաղաի Յան-Ռայնիս 7,բն 44 հասցեում, սակայն բնակվում է Բաղրամյան 30,բն20 հասցեում
2019 թվականին մանդատ ստանալուց հետո Քոչարյանը Բարձրաստիճան պաշտոնյաների էթիկայի հանձնաժողովում որպես անշարժ գույք հայտարարագրել է Բաղրամյան 30 հասցեում գտնվող 92քմ մակերեսով բնակարան և նույն հասցեում գտնվող 19քմ մակերեսով ավտոտնակ։ Պատգամավորը շարժական գույք չունի։
Նրա դրամական միջոցները կազմել են 5մլն դրամ։ Եկամուտները նշված չեն հայտարարագրում։
Պատգամավորի կնոջ՝ Լուսինե Քոչարյանի հայտարարագիրը ներկայացված չէ։