Արամ Մանուկյանի և Պավլիկ Մանուկյանի գործերով նախաքննությունն ավարտվել է. կարծում եմ՝ դատարանում գործերը կմիացվեն. պաշտպան
2016 թվականի հուլիսի 17-ին զինված խմբի կողմից ՀՀ ոստիկանության Երևան քաղաքի վարչության պարեկապահակետային ծառայության (ՊՊԾ) գնդի վարչական շենքերն ու հարակից տարածքը զավթելու և պահելու դեպքի առթիվ կալանավորված «Սասնա ծռերից» Արամ Մանուկյանի և Պավլիկ Մանուկյանի մասով նախաքննությունն ավարտվել է. գործը մայիսին կուղարկվի դատարան:
Այս մասին Tert.am-ի հետ զրույցում ասաց նրանց պաշտպաններից Հարություն Բաղդասարյանը:
«Ինչպես հայտնի է, գործերն առանձնացվել են և առանձին գործերով՝ Պավլիկ Մանուկյանի և մյուս 11-ի մասով նյութերը 69 հատոր են կազմում, իսկ Արամ Մանուկյանի ու մյուսների մասով՝ 42: Նախաքննությունն ավարտվել է և գործը մայիսին կուղարկվի դատարան»,-ասաց Հարություն Բաղդասարյանը:
«Իմ կարծիքով՝ այդ գործերը դատարանում կմիացվեն, որովհետև անհավատալի է, որ դրանք առանձին գործեր են: Բացի դրանից՝ Պավլիկ Մանուկյանի ու մյուսների մասով գործի նախաքննության ավարտը հայտարարվել էր նախորդ տարվա նոյեմբերին, որոշ ժամանակ անց հայտարարվեց, որ գործի վարույթը վերսկսվել է, և երկու օր առաջ կրկին ավարտ հայտարարվեց ու 5 հատոր կրկին ավելացվեց»,-ասաց պաշտպանը:
Հարցին, թե որքան ժամանակ կպահանջվի գործի նյութերին ծանոթանալու համար, Բաղդասարյանը պատասխանեց, որ գոնե մինչև հուլիս ժամանակ է պետք գործի նյութերին ծանոթանալու համար:
Հիշեցնենք, որ Արամ Մանուկյանին մեղադրանք է առաջադրվել ՀՀ քրեական օրենսգրքի 218-րդ հոդվածի 3-րդ մասի 1-ին կետով, 219-րդ հոդվածի 3-րդ մասի 1-ին կետով, 235-րդ հոդվածի 3-րդ մասով, 238-րդ հոդվածի 4-րդ մասի 1-ին և 2-րդ կետերով և 185-րդ հոդվածի 3-րդ մասի 1-ին կետով:
Պավլիկ Մանուկյանին մեղադրանք է առաջադրվել ՀՀ քրեական օրենսգրքի 219-րդ հոդվածի 3-րդ մասով, 235-րդ հոդվածով, 238-րդ հոդվածի 4-րդ մասի 1-ին ու 2-րդ կետերով և 185-րդ հոդվածի հատկանիշներով: