Պատգամավոր Հայկ Սարգսյանը 8–րդ դատական հայցն է ներկայացրել ընդդեմ լրատվամիջոցի
ԱԺ «Իմ քայլը» խմբակցության պատգամավոր Հայկ Սարգսյանը 8–րդ դատական հայցն է ներկայացրել ընդդեմ լրատվամիջոցի։
Հայկ Սարգսյանի կողմից ներկայացված վերջին հայցադիմումը դատարան է մուտք եղել հոկտեմբերի 1–ին։ Պատգամավորն այս անգամ դատի է տվել «Իրատես» հասարակական-քաղաքական թերթին՝ զրպարտության եւ վիրավորանքի միջոցով պատվին, արժանապատվությանը հասցված վնասի հատուցման պահանջով։
NEWS.am–ի հետ զրույցում Սարգսյանի ներկայացուցիչ, փաստաբան Տիգրան Հայրապետյանը հայտնեց, որ հայցադիմում ներկայացնելու համար հիմք է հանդիսացել «Իրատես» թերթի սեպտեմբերի 6–ի հրապարակումը։
Թերթը, հղում կատարելով իր աղբյուրներին գրել էր, որ Աննա Հակոբյանի մասնակցությամբ անցկացված ՔՊ նիստում մի ուշագրավ դրվագ է եղել։ «Նիկոլի շիշ բռնող» արտահայտությունից զայրացող ու մամուլին դատի տվող Հայկ Սարգսյանը, երբ Ամուլսարի շահագործմանը դեմ է խոսել, Աննա Հակոբյանը նրան կրկին իր կարգավիճակն է հիշեցրել. «Դու ընդամենը Նիկոլի շիշը բռնողն ես եղել»,-գրել է թերթը:
Այս արտահայտությունները պատգամավորը համարում է վիրավորանք եւ զրպարտություն եւ լրատվամիջոցից պահանջում է փոխհատուցում 1 մլն դրամի չափով։
Հիշյալ գործը մակագրվել է Երեւան քաղաքի դատարանի դատավոր Ռուբեն Ափինյանին։
Ավելի վաղ պատգամավորը դատի էր տվել եւս յոթ լրատվամիջոցի։ Հայցադիմումներից երեքը ներկայացվել է «Հրապարակ» օրաթերթի դեմ, մեկը՝ «Իրավունք Մեդիա» ՍՊԸ-ի , երկուսը՝ «Անդրադարձ մամուլի ակումբ» ՀԿ-ի, մեկը՝ «ԱՐՄԴԵՅ.ԷՅԷՄ» ՍՊԸ–ի դեմ։
Յոթ գործերով էլ պահանջը նույնն է՝ զրպարտության եւ վիրավորանքի միջոցով պատվին, արժանապատվությանը եւ բարի համբավին հասցված վնասի հատուցում: