Օդանավակայանային հանդիպումները ոգեւորիչ չեն կարող լինել
Հայ-ռուսական հարաբերությունները, մեղմ ասած, լավ օրեր չեն ապրում: Այդ մասին վկայում են բազմաթիվ իրադարձություններ եւ փաստեր, սակայն ՌԴ նախագահ Վլադիմիր Պուտինի երեւանյան այցը դրա ամենավառ դրսեւորումն էր:
Օդանավակայանում կայացած հանդիպումը եւ այդ մասին Նիկոլ Փաշինյանի ֆեյսբուքյան գրառումը վկայում է հենց այդ մասին: Իհարկե, եթե Պուտինն ու Փաշինյանը ժամուկեսանոց հանդիպում ունենային աշխարհի այլ մայրաքաղաքի օդանավակայանում, ապա այս փաստը մեզ չէր մտահոգի:
ՌԴ նախագահ Վլադիմիր Պուտինը Նիկոլ Փաշինյանին փորձեց իրավիճակը մանրամասն ներկայացնել ոչ թե Երեւանում, այլ հենց օդանավակայանում: Սա շատ խորհրդանշական փաստ է: Պուտինը օդանավակայանային հանդիպումով ապացուցեց, թե իրականում ՀՀ «նոր» իշխանություններն ուր են հասցրել միջպետական հարաբերությունները:
Եւ հիմա, երբ Փաշինյանն ասում է, թե կարծում է, որ օդանավակայանում ՌԴ նախագահի հետ ունեցած մանրամասն զրույցը նոր խթան կտա հայ-ռուսական հարաբերություններին, կրկին միայն տխուր մտորումներ է առաջացնում:
Գազի գինը դեռ մի կողմ: Գազը թանկանալու է, բայց կան շատ ավելի կարեւոր հարցեր: Շարունակելով այն քաղաքականությունը, որ վարում է Փաշինյանի կառավարությունը, Հայաստանը հայտնվելու է աննախադեպ ծանր վիճակում, ինչը, իհարկե, չի կարելի թույլ տալ:
Փաշինյանը, երբ ցինիկ մեսիջներ էր հասցեագրում ՌԴ ԱԳ նախարար Սերգեյ Լավրովին, երբ խախտելով օրենքն ու ՍԴ որոշումը ՌԴ երկրորդ նախագահին պահում է կալանքի տակ, երբ ՌԴ նախագահին դիմավորում է բողոքի ցույցով, ապա Ռուսաստանում այս ամենից հետեւություններ են անում եւ դեռ կանեն, քանի դեռ Հայաստանում չի հաղթել սթափ եւ առողջ տրամաբանությունը:
Նիկոլ Փաշինյանի հետ կարելի է համաձայնել մեկ հարցում. օդանավակայանային հանդիպումը երեւանյան կարճատեւ հանդիպման տրամաբանական շարունակությունն էր: Պուտինը վերջին փորձն արեց Փաշինյանին իրականության դաշտ բերելու համար:
Վարդան Մխիթարյան
Top-News.am