Այն դատավորները, որոնք տարիներ շարունակ ցածր վարկանիշ են ունեցել, այսօր հերոսներ են դարձել . Երեմ Սարգսյան
ՊԵԿ նախկին նախագահ Գագիկ Խաչատրյանի համար սպասելի էր Վերաքննիչ քրեական դատարանի կայացրած որոշումը։ Այս մասին այսօր՝ սեպտեմբերի 30–ին Վերաքննիչ քրեական դատարանի շենքի մոտ լրագրողների հետ զրույցում ասաց Խաչատրյանի պաշտպան Երեմ Սարգսյանը։
Հարցին, արդյո՞ք Գագիկ Խաչատրյանն իր նկատմամբ իրականացվող քրեական հետապնդումը պայմանավորում է քաղաքական գործոնով, Երեմ Սարգսյանը պատասխանեց, որ այդ մասին չի զրուցել իր պաշտպանյալի հետ։
«Ցավով եմ արձանագրում, որ դատական համակարգը նման իրավիճակում է հայտնվել , մենք անընդհատ խոսում ենք դատական համակարգն արդիականացնելու մասին, սակայն այն դատավորները, որոնք տարիներ շարունակ ցածր վարկանիշ են ունեցել, այսօր հերոսներ են դարձել , քանի որ անում են այն, ինչ ցանկանում է իշխանությունը, իսկ այն դատավորները, որոնք նախկինում համարվում էին քիչ թե շատ նորմալ, օբյեկտիվ որոշումներ կայացնողներ, այսօր էլ չեն կարող նման որոշումներ կայացնել։ Այն առաջընթացը, որ առկա էր հեղափոխությունից հետո դատական համակարգում, երբ դատարանները որոշակի անկախություն ունեին, այժմ պետք է արձանագրել, որ դատական համակարգը կործանվել է»,–հայտարարեց Երեմ Սարգսյանը։
Փաստաբանը նկատեց, որ եթե ժամանակին դատական համակարգին մոտ կանգնած ցանկացած ոք կարող էր ասել, որ Վերաքննիչ դատարանը կարողանում էր քիչ թե շատ անկախ որոշումներ կայացնել, սակայն այսօր այլեւս չի կարողանում հաղթահարել այդ ճնշումները։
«Ռուբիկ Մխիթարյանի պես դատավորը, որն աչքի է ընկել իր կողմից կայացրած անկախ, օբյեկտիվ որոշումներով , այսօր փաստացի չկարողացավ հաղթահարել այն ճնշումները, որոնք առկա են իր նկատմամբ։ Երկու դատական ատյաններում էլ մենք դատավորներին ասում էինք, որ այս քրեական գործով ակնհայտ է ճնշումները, սակայն եթե դատարանը մեր ներկայացրած առարկությունները կոնկրետ փաստերով հերքի, կարող ենք արձանագրել, որ արդար որոշում է կայացրել, սակայն առաջին ատյանի դատարանի դատավորը որեւէ կերպ չի փաստարկել մեր առարկություները»,–ասաց նա։
Երեմ Սարգսյանը նաեւ նշեց, որ թեեւ իր պաշտպանյալը չի ցանկանում խոսել առողջական խնդիրների մասին, սակայն առաջիկայում ստիպված են լինելու բարձրաձայնել նաեւ այդ հարցը։ Հիշեցնենք, որ ՀՀ վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ այսօր որոշում կայացրեց մերժել առանձնապես խոշոր չափերի վատնում կատարելու եւ պաշտոնեական լիզորութունները չարաշահելու մեջ մեղադրվող ՊԵԿ նախկին նախագահ Գագիկ Խաչատրյանի պաշտպանների միջնորդությունը եւ նրան կալանավորելու՝ առաջին ատյանի դատարանի որոշումը թողեց ուժի մեջ։
Ավելի վաղ հայտնել ենք, որ Ազգային անվտանգության ծառայությունը Գագիկ Խաչատրյանին եւ նրա եղբորորդուն՝ ՊԵԿ նախկին պաշտոնյա Կարեն Խաչատրյաններին ձերբակալել է օգոստոսի 27-ին. երեք օր անց նախկին պաշտոնյաները կալանավորվել են։ Խաչատրյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով (Պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ) եւ 179-րդ հոդվածի 3-րդ մասի 1-ին կետով (առանձնապես խոշոր չափերով վատնում կատարելը) նախատեսված հանցագործությունների կատարման՝ պաշտոնեական դիրքի չարաշահման եւ առանձնապես խոշոր չափերի վատնման համար։ Նրան եւ եղբորորդուն առաջադրված մեղադրանքն առնչվում է Գագիկ Խաչատրանի` Ֆինանսների նախարար եւ ՊԵԿ նախագահ եղած ժամանակահատվածում կատարված ենթադրյալ հանցանքներին։Օրերս էլ հայտնի դարձավ, որ Գագիկ Խաչատրյանի համաձայնությամբ ԱԱԾ-ի դեպոզիտ հաշվին փոխանցվել է նրան վերագրվող ենթադրյալ հանցագործությամբ պատճառված վնասը՝ շուրջ 200 մլն դրամ գումարը: