Փաշինյանական արդարադատության հերթական դրսեւորումը
Երեւանի ընդհանուր իրավասության դատավոր Աննա Դանիբեկյանի հանդեպ կատարվածը դատապարտում են շատերը, բայց ոչ բոլորն են ուշադրություն դարձնում այն փաստին, որ մի քանի ամիս առաջ վարչապետի կոչով շրջափակվեցին դատարանները, քաշքշեցին դատավորին, նրան վայր գցեցին, բայց որեւէ մեկը դրա համար ոչ ձերբակալվեց, ոչ էլ պատասխան տվեց:
Դատապարտում են Աննա Դանիբեկյանի հետ կատարվածը, բայց ծպտուն անգամ չեն հանում այն մասին, որ դատավոր Դավիթ Գրիգորյանի վրա շատ ավելի մեծ ճնշումներ գործադրվեցին իր հայտնի որոշումից հետո:
Սա ընտրովի արդարադատություն է, սա փաշինյանական արդարադատություն է, որն իրական արդարադատության, արդարության հետ որեւէ աղերս չունի: Մի դեպքում կարելի է դատավորներին հայհոյել, քաշքշել, վայր գցել, մյուս դեպքում անգամ չի կարելի կողքով քայլել եւ հարցեր ուղղել, առանց անձնական վիրավորանք հասցնելու:
Եւ մի՞թե Նիկոլ Փաշինյանն ավելի ծանր վիրավորանք չհասցրեց դատավորներին, երբ խոսում էր նրանց վնգստալու մասին, քան նախօրեին ձերբակալված երիտասարդը, որը միայն քայլել էր դատավորի կողքով եւ նրան հարցեր տվել:
Սա եւս փաշինյանական արդարադատության վառ դրսեւորումներից մեկն է:
Նիկոլ Փաշինյանը, կարծես թե, դատարանը համարում է իր կամքի արտահայտող մարմին, եւ երբ դա իրականություն չի դառնում, նա հունից դուրս է գալիս եւ կոչ անում շրջափակել դատարանները կամ վիրավորում դատավորներին, նրանց վրա շարունակական ճնշում գործադրելով:
Աննա Դանիբեկյանի հետ տեղի ունեցածը եւս մեկ անգամ ցույց տվեց մեր հասարակության զարգացման իրական մակարդակը: Փաստորեն շատերը, որոնք իրենց ներկայացնում էին մարդու իրավունքի պաշտպաններ, ժողովրդավարության համար պայքարող մարտիկներ, ընդամենը նեղ անձնական խնդիրներ լուծող մանր դեմքեր էին, որոնք դատապարտում են անարդարությունը եւ բռնությունը, երբ դա իրենց եւ իրենց թիմակցի է հետ է տեղի ունենում եւ պապանձվում կամ նույնիսկ պաշտպանում եւ արդարացնում, երբ այն տեղի է ունենում իրենց հակառակորդի կամ իրենց հետ կապ չունեցող մարդկանց հետ:
ԱԺ պատգամավորներ, դուք մի քանի ամիս առաջ բռնություն էիք գործադրում դատարանների մոտ, ձեր աչքի առաջ դատավոր էին վայր գցում, իսկ հիմա դուք խրոխտ հայաքով, պատռելով ձեր կուրծքը դատապարտում եք մի երիտասարդի, որն ընդամենը դատավորին շատ քաղաքավարի տոնով հարց է ուղղել: Աժ պատգամավորներ, դուք իրո՞ք չեք հասկանում, թե ինչ եք ասում կամ անում:
Ոստիկաններ, դուք անգամ աջակցում էիք դատարանները շրջափակողներին, անգամ օգնում նրանց, իսկ հիմա դատավորի կողքով քայլողին այնպես եք ձերբակալում, կարծես ահաբեկիչ էիք հայտնաբերել եւ չեզոքացնում: Լավ, դուք եւս չեք հասկանո՞ւմ, թե ինչ եք անում:
Եւ այսքանից հետո ինչպես չկիսես նրանց համոզմունքը, ովքեր պնդում են, որ Նարեկ Մութաֆյանի ձերբակալությունը քաղաքական է: Այսպես չէին պնդի, եթե դատարանները շրջափակելու կոչ անելուց հետո նույն կերպ ձերբակալվեր Նիկոլ Փաշինյանը, իսկ հետո ձերբակալվեին բոլոր նրանք, ովքեր դատարաններն էին շրջափակել:
Ոչինչ չի մոռացվում, ոչ ոք չի մոռացվում: Ու լավ հիշեք, ԽՄԿԿ 20-րդ համագումարից հետո բանտերում հայտնվեցին բոլոր այն ոստիկանները, դատավորները, դատախազները, որոնք գլուխները կախ կատարում էին Ստալինի եւ նրա վարչախմբի հրահանգները: Մի մոռացեք այս մասին:
Վարդան Մխիթարյան
Top-News.am