Փաշինյանը Վանեցյանին համեմատեց պուտչիստների հետ
Նիկոլ Փաշինյանը ծանր, շատ ծանր է տանում ԱԱԾ արդեն նախկին ղեկավար Արթուր Վանեցյանի հրաժարականի ժամանակ արված հայտարարությունը: Ավելին, հասնելով ԱՄՆ այնտեղ խոստովանել է, թե այդ ինքն է ԱԱԾ-ից պահանջել կայքից հանել նրա հայտարարությունը:
Խոսելով Վանեցյանի հրաժարականի, ավելի ճիշտ հայտարարության մասին, նա մի քանի ուշագրավ հայտարարություններ է արել, որը հանրությանը, քաղաքական ուժերին, հասարակական կազմակերպություններին պետք է լուրջ մտորումների առիթ տա:
Նիկոլ Փաշինյանն ասել է, թե Արթուր Վանեցյանը հայտարարություն է արել իր գերագույն հրամանատարի դեմ: Մի մարդ, որը խոսում է ժողովրդավարությունից, մի մարդ, որն առիթ, անառիթ խոսում է ժողովրդավարական Հայաստան կառուցելու մասին, քննադատում հներին, խոստովանում է, որ չի հանդուրժում քննադատությունը, չի հանդուրժում այլակարծությունը:
Ափսոս լրագրողները Նիկոլ Փաշինյանին չհարցրին, թե այդ որ օրենքում կամ Սահմանադրության ո՞ր հոդվածում է գրված, որ նախարարները, պաշտոնյաները, պատգամավորները չեն կարող քննադատել վարչապետին:
Մյուս հարցը, այդ որտեղ է գրված, որ հիմա Նիկոլ Փաշինյանը ինչ-որ մեկի, այդ թվում ԱԱԾ պետի գերագույն հրամանատարն է: Սահմանադրության 155-րդ հոդվածի չորրորդ կետում հստակ գրված է. Պատերազմի ժամանակ զինված ուժերի գերագույն հրամանատարը վարչապետն է:
Իսկ հիմա պատերազմական իրավիճակ չէ: Հիմա պատերազմ չկա եւ ինչու է այդ դեպքում Նիկոլ Փաշինյանը նման հայտարարություն անում:
Այսքանից հետո վարչապետը պարզապես վիրավորում է մի մարդու, որը ամենադժվարին պահին եղել է իր թիմակիցը, իրեն ձեռք մեկնել ամենադժվարին եւ պատասխանատու պահին, իսկ հիմա գլխավորում է Հայաստանի ֆուտբոլի ֆեդերացիան:
Մի՞թե երկրի ղեկավարին հարիր է նման տոնով, նման բառապաշարով խոսել մարդու, ԱԱԾ-ն ղեկավարած, ՀՖՖ-ն ղեկավարող մարդու մասին: Ի՞նչ է նշանակում ասել, թե հայտարարություն անելով Վանեցյանը անարգում է սպայի պատիվը, ուսադիրները գցում աղբամանը:
Իսկ ի՞նչ է անում վարչապետը, երբ նման հայտարարություն է անում: Մի՞թե անդադար կարելի է խաղալ հանրության առավել չկրթված եւ միամիտ զանգվածի հուզական վիճակի, զգացմունքների հետ:
Ինչո՞ւ է Նիկոլ Փաշինյանը Վանեցյանին համեմատում է 1991 թվականի պուտչիստների հետ: Ի՞նչ հետեւանք կունենա հանրության եւ Արթուր Վանեցյանի համար այս հայտարարությունը: Չե՞ք կարծում, որ այս հայտարարությունները նման են անցած դարի երեսունականներին ԽՍՀՄ-ում պաշտոնանկ արված կուսակցական ղեկավարների հետեւից հնչող խոսքերին:
Հանրության բոլոր հատվածները, շերտերը պետք է հարց տան՝ մի՞թե մենք իշխանափոխություն, հեղափոխություն ենք արել անցած դարի երեսունականներ վերադառնալու համար:
Իսկապես, որքա՞ն պետք է շարունակվի հանրությանը գրգռելուն ուղղված հայտարարությունները: Ի՞նչ կապ ունի Արթուր Վանեցյանը ՀՀ զինված ուժերի հետ կամ ի՞նչ կապ ունի Նիկոլ Փաշինյանը ՀՀ զինված ուժերի հետ, որ հայտարարում է, թե ԱԱԾ նախկին պետն իր քայլով անարգում է ՀՀ զինված ուժերը:
Եւս մեկ անգամ շեշտենք, Հայաստանը պատերազմական վիճակում չէ:
Վարդան Մխիթարյան
Top-News.am