«Հայաստանի հեռուստատեսության եւ ռադիոհաղորդիչ ցանց» ՓԲԸ-ում կադրային ջարդ ու համատարած կրճատումներ են
«Հայաստանի հեռուստատեսության եւ ռադիոհաղորդիչ ցանց» ՓԲԸ-ում կադրային ջարդ ու համատարած կրճատումներ են սկսվել։ Ընկերությունը, որը պատկանում է Հակոբ Արշակյանի գլխավորած բարձրտեխնոլոգիական արդյունաբերության նախարարությանը, հուլիսից ղեկավարում է Մուշեղ Միլիտոնյանը՝ Գրողների միության նախագահ Էդվարդ Միլիտոնյանի որդին։
Հենց նա էլ, նոր Հայաստանի «հեղափոխական» ոգուն համապատասխան, որոշել է փորձառու եւ բանիմաց աշխատակիցներին համատարած կրճատել՝ փոխարենը ոչինչ չառաջարկելով։ Եվ պարզ չէ, թե ովքեր կփոխարինեն նրանց, հատկապես, որ ոլորտը շատ յուրահատուկ է՝ պրոֆեսիոնալ մասնագետների դժվար է գտնելը, որոնք կկարողանան հմտորեն աշխատել հեռահաղորդակցության ցանցի, հեռուստաաշտարակի հետ։ Բայց սա, բնականաբար, նոր Հայաստանի չինովնիկներին քիչ է հետաքրքրում․ իրենց պետք է կրճատել՝ կրճատում են, անունը դնում օպտիմալացում, բարեփոխում, երիտասարդացում։ ՓԲԸ տնօրեն Մուշեղ Միլիտոնյանը մեր հարցին, թե ճի՞շտ է, որ մոտ 6 տասնյակի հասնող աշխատակիցների աշխատանքից ազատման ծանուցումներ են ուղարկել եւ ի՞նչ նպատակով, ասաց․ «Աշխատանքային կրճատումներ են տեղի ունենում հիմնարկում, բոլոր կրճատվողները կրճատվում են օրենքին համապատասխան»։
- Օրենքի ո՞ր դրույթին համապատասխան։
- Բոլոր կրճատվողները թոշակառու են՝ 65-ից բարձր տարիքով։
- Իսկ ովքե՞ր են նրանց փոխարինելու։
- Սերնդափոխություն է՝ նրանց հետեւից նրանց տեղակալներն են գալու, գլխավոր մասնագետները եւ այլն։
- Այսինքն՝ միայն թոշակառու լինե՞լն է պատճառը, որ նրանք չաշխատեն այդ հիմնարկում։
- Հիմնականում կրճատումները, այո, վերաբերելու են տարիքով աշխատողներին։
- Իսկ աշխատանքային փորձը, ստաժը, կարողությունները, հմտությունները հաշվի չե՞ն առնվում ձեզ մոտ։
- Բոլորի փորձն էլ մենք հարգում ենք եւ պատրաստվում ենք պատվով ճանապարհել նրանց։ Խնդիրը հետեւյալն է, որ չենք ցանկանում որեւէ մեկին բացառություն անել, որովհետեւ բոլորի փորձն էլ հարգելի է։
- Իսկ արդյոք դրանից հետո ավելի փորձառուներ կգա՞ն, կկարողանա՞ն ավելի արդյունավետ իրականացնել աշխատանքը։
- Միանշանակ՝ կկարողանան, որովհետեւ կրճատվողներին փոխարինողներ են պատրաստվել այս տարիների ընթացքում, եւ էդ փոխարինողներն են շարունակելու։ Այն տեղերում, որտեղ տեխնիկական աշխատողներ են, տեխնիկական կրթությամբ եւ բազմաթիվ տարիների փորձառությամբ մարդիկ են գալու։
- Որքանով տեղյակ եմ, բավականին յուրահատուկ ոլորտ է, եւ հեշտ չէ լավ մասնագետ գտնելը։
- Մեր մասնագետները լինելու են հենց տեղից, դրսից չեն գալու՝ 99 տոկոսով։
- Հիմա Դուք վստա՞հ եք, որ այն մարդիկ, որոնք ընդամենը թոշակի տարիքի են հասել, չեն կարողանալու, օրինակ, եւս մեկ տարի արդյունավետ աշխատել։
- Թոշակի տարիքի մասին չգիտեմ՝ Դուք ինչ հետեւություններ եք անում, մասնագետներ կան, որոնք 73-74 տարեկան են։
- Շատ լավ, եթե 73 տարեկանը կարողանում է նույն առույգությամբ կատարել իր աշխատանքը, ի՞նչն է խանգարում, որ նրան պահեք։
- Հիմա իրեն փոխարինելու է ավելի երիտասարդ կադր, որը նույնպես երկար տարիներ աշխատել է, էդ աշխատանքի մեջ արդեն հմտացել է, կփոխարինի նորմալ։
- Պարզապես նոր կառավարության փորձն աչքի առաջ ունենք, երբ փորձառուները գնում են, նրանց փոխարինելու են գալիս անփորձներն ու ոչ պրոֆեսիոնալները։
- Էդ առումով հանգիստ եղեք, մենք որեւէ մեկին՝ ոչ պրոֆեսիոնալ, չենք ընդունի աշխատանքի։ Բոլորը պատրաստել են համապատասխան կադրեր՝ բացառությամբ մի քանի տեղերի, որոնք հնարավոր է՝ էդ կադրերը դրսից բերվեն։
- Իսկ նրանց, որոնց աշխատանքից ազատման ծանուցագիր եք ուղարկել, փոխարենը այլ աշխատանք առաջարկե՞լ եք, ինչպես նախատեսված է Աշխատանքային օրենսգրքով։
- Օրենսգրքով նախատեսված է հետեւյալը․ մենք ունենք ժամկետային պայմանագիր, քանի որ նրանք արդեն վաղուց թոշակի տարիքից անցել են, բոլորի հետ կնքվում է ժամկետային պայմանագիր։ Ժամկետային պայմանագիրն ավարտվելուց 10 օր առաջ՝ ըստ օրենսդրության, տեղյակ ենք պահել։ Ներկա պահին պրոցեսն ավելի շուտ ենք սկսել, որպեսզի մարդիկ պատրաստ լինեն դրան։