Իմքայլականները՝ զավեշտալի վիճակում
Ամիսներ առաջ ԱԺ նախագահի պաշտոնը զբաղեցնող Արարատ Միրզոյանը պատասխանելով ՍԴ նախագահին վերաբերող լրագրողի տված հարցին, շատ դիպուկ նկատել է, որ այն Ազգային ժողովի եւ նրա նախագահի լիազորությունների մեջ չի մտնում:
Թե ինչ եղավ Արարատ Միրզոյանի հետ, դժվար է ասել, բայց որ նա իր ասածին հակասող ելույթ ունեցավ մի քանի օր առաջ՝ փաստ է: տարօրինակ է, որ այս փաստը որպես ձեռք բերում Նիկոլ Փաշինյանը չներկայացրեց իր փաստերի շարքում:
Եթե իմքայլականների առաջնորդներից մեկը, ԱԺ նախագահ Արարատ Միրզոյանը չի հասկանում, թե ինչու պետք է պաշտոնանկ արվի Հրայր Թովմասյանը, ապա ինչու ենք կենտրոնանում Հովիկ Աղազարյանի՝ իմքայլական պատգամավորի վրա, որը հայտարարել էր, որ եթե Հրայր Թովմասյանը չդիմեր Վենետիկի հանձնաժողով, մեր դեմ, այսպես ասած, տղա չբերեր, գուցե իր հրաժարականն էլ չպահանջեինք։
Մակունցը, իմքայլականների խմբակցության ղեկավարը, որը մշտապես աչքի է ընկնում Հովիկ Աղազարյանից ոչ պակաս զավեշտալի հայտարարություններով, շտապեց սրբագրել իր գործընկերոջը:
Մակունցը ֆեյսբուքյան իր էջում գրել է. «Ներքոնշյալ ձեւակերպումը բացառապես Հովիկ Աղազարյանի մասնավոր ընկալումն է։ Խմբակցության շարժառիթները եւ հիմնավորումները ներկայացված են խմբակցության որոշման հավելվածում»:
Թե ինչ է ասել դրանից հետո Հովիկ Աղազարյանը, այդքան էլ կարեւոր չէ: Այս պատմության առանցքն այն է, որ իմքայլականները չեն տիրապետում իրավիճակին, նրանք չեն էլ հասկանում իրենց իսկ կայացրած որոշումների տրամաբանությունը, իմաստը, հիմքը:
Պատահական չէ, որ Մակունցը Հովիկ Աղազարյանին անդրադարձել է ֆեյսբուքյան գրառումով, քանի որ եթե զրուցեր լրագրողների հետ, ապա հավանորեն ավելի զավեշտալի վիճակում կհայտնվեր, քան իր գործընկերը, քանի որ որեւէ պատգամավոր չի կարող հիմնավորել, թե որ օրենքով կամ Սահմանադրության որ կետով կարող են Սահմանադրական դատարանի նախագահի պաշտոնանկության գործընթաց սկսել:
Հակոբ Ասատրյան
Top-News.am