Ես միանշանակ հայացք չունեմ Ամուլսարի հարցի շուրջ. «Անհայտ բաժանորդը» ֆիլմի դերասանը կվերցնի մանդատը
Ինչպես արդեն հայտնել ենք, այսօր ԱԺ «Իմ քայլը» դաշինքի պատգամավոր Էդգար Առաքելյանի լիազորությունները դադարեցվել են, իսկ ցուցակով հաջորդ թեկնածուն Երևանի ավագանու «Իմ քայլը» խմբակցության անդամ Արթուր Մանուկյանն է։
ArmDaily.am-ի հետ զրույցում Արթուր Մանուկյանը հայտնեց, որ մանդատը վերցնելու է. «Ֆրակցիայի հետ անընդհատ կապի մեջ եմ, ես չեմ ուզում խուսափել այդ ծանրությունից և պատասխանատվությունից»։
Հարցին՝ արդյո՞ք չի վախենում քաղաքական թիմի հետ կապված հայացքների ու դիրքորոշումների հետ խնդիրներ ունենալուց՝ Մանուկյանը պատասխանեց. «Ես ՔՊ-ից եմ և հիմնադիրներից եմ, մենք միշտ ունենում ենք տարաձայնություններ և այդ տարաձայնությունները լուծում ենք քննարկումների միջոցով։ Մեզ մոտ դրվածքը էդպես է՝ մենք բոլորս ասում ենք մեր կարծիքները, խոսում ենք, քննարկում ենք և գալիս ենք ինչ որ հայտարարի։
Դիտարկմանը, որ Ամուլսարի հարցում տարակարծություն եղել է, կուսակիցներից ոմանք բացահայտ դեմ են արտահայտվել, իսկ Էդգար Առաքելյանի կողմից մանդատը վայր դնելու հիմնական պատճառներից մեկն էլ հենց այս հարցի շուրջ ունեցած տարակարծությունն էր՝ Մանուկյանը հայտնեց. «Ես դերասան եմ, ռեժիսոր, երգիչ և այս տեսակ հարցերը ինձ համար մի տեսակ ավելի շատ էսթետիկ ու էթիկ բնույթ են կրում, քան տնտեսական։ Ես իհարկե կողմ եմ, որ սարը մնա սար, ձորը մնա ձոր, բնությունը մնա բնություն, ատոմակայաններ չլինեն, Նաիրիտը չլինի, բայց այն փորձանքը, որ ժողովուրդը ապրեց 90-ականներին՝ փակելով ատոմակայան և Նաիրիտ, դա եղել է կոնկրետ փորձանք էս ժողովրդի գլխին, հազարավոր մարդիկ լքեցին երկիրը, միլիոնավոր երեխաներ չծնվեցին, հազար ու մի բացասական հետևանքներ ունեցան էդ բացասական գործարանները, նաև ատոմակայանը, որը էկոլոգիային օգուտ չի, ես չգիտեմ»։
Հարցին՝ Ամուլսարի մասով ի՞նչ դիրքորոշում ունեք՝ պետք է սար մնա, թե՞ հանք դառնա՝ Մանուկյանը պատասխանեց. «Ինձ համար դժվար է այդ հարցին պատասխանել, ավելի ճիշտ է մասնագետներին լսել և կողմնորոշվել նրանց կարծիքով, մի էմոցիոնալ և առաջին հայացքից ճշմարիտ խնդիր, չնայած երկրորդ հայացքից ևս ճշմարիտ է, ես միանշանակ հայացք չունեմ այս խնդիր շուրջ, ավելի լավ է լսեմ մասնագետներին, ովքեր խորամուտ են եղել և խորապես ուսումնասիրել են՝ բացելու ու փակելու վնասներն ու օգուտները»։
Մանուկյանը նշեց, որ Ազգային Ժողովում մշակութային խնդիրներ է բարձրաձայնելու՝ կինոյի ու թատորնի մասին հարցեր է բարձրաձայնելու. «Ես այդ ոլորտում վաղուց եմ և խնդիրները իմ մաշկի վրա զգացել եմ։ Հիմա կինոներում ու թատրոններում եմ խաղում, խաղում եմ «Անհայտ բաժանորդը» ֆիլմում, նախօրոք ունեցած պայմանավորվածությւոններ կան, պետք է փորձեմ հասկանալ օրենքով թույլատրվում է ինձ օրենքով այդ պայմանավորվածությունները կատարել, թե՝ օրենքը արգելում է»։
Հիշեցնենք, որ Էդգար Առաքելյանը մանդատը վայր դնելու մասին հայտարարել էր Facebook-ի իր էջում օգոստոսի 29-ին, որտեղ նշել էր. «Որոշումը բացառապես իմն է, պարտադրված կամ հրահրված չէ որեւէ մեկի կողմից: Պատճառները մաքուր անձնական տիրույթում են: Քաղաքականությամբ զբաղվող անձը պիտի օժտված լինի քաղաքականությամբ զբաղվելու համար անհրաժեշտ որակներով: Խորապես հավատացած եմ, որ ինձ մոտ այդ որակներից մի քանի կարեւորագույնները բացակայում են, ինչն ինձ անհամատեղելի է դարձնում այդ գործունեության հետ»:
Նշենք, որ «Իմ քայլը» դաշինքի ցուցակում հաջորդ թեկնածուն Երեւանի ավագանու «Իմ քայլը» խմբակցության անդամ, մասնագիտությամբ՝ ռեժիսոր, «Քաղաքացիական պայմանագիր» կուսակցության անդամ Արթուր Մանուկյանն է: