Գիտնականները նշել են մահացու վտանգավոր ոչ ալկոհոլային խմիչքները

Գիտնականների միջազգային խումբն ապացուցել է, որ կոլայի, լիմոնադի և նման ոչ ալկոհոլային խմիչքների կանոնավոր սպառումը մեծացնում է վաղաժամ մահվան և վտանգավոր հիվանդությունների զարգացման ռիսկը, Известия-ի փոխանցմամբ՝ գրում է Die Welt-ը:

Աղբյուրը նշում է, որ նույնիսկ քաղցր գազավորման փոխարինումը շաքարազերծված տարբերակով չի բարելավում իրավիճակը:

Մասնագետները ուսումնասիրել են 10 երկրի 450 հազար մարդու տվյալներ, որոնց միջին տարիքը 50-ն է:

Գիտնականները նրանց առողջությանը հետևել են 16 տարի՝ անցկացնելով հարցումներ նրանց նախընտրելի ուտեստների, ֆիզիկական ակտիվության, ծխախոտի և ալկոհոլի օգտագործման վերաբերյալ: Նաև տվյալներ են հավաքագրել գազավորված ըմպելիքների օգտագործման մասին:

Փորձի մասնակիցները բաժանվել են երկու խմբի. նրանք, որոնք քաղցր ըմպելիք են ծմում ամսական մեկ բաժակից պակաս (250 մլ) և նրանք, որոնք խմում են առնվազն երկու բաժակ մեկ օրում:

«Ուսումնասիրության ընթացքում ոչ ալկոհոլային խմիչքներ օգտագործողների 11,5 տոկոսը մահացել է»,- նշում են գիտնականները:

Համեմատելով բոլոր ցուցանիշները՝ փորձագետները եկել են այն եզրակացության, որ գազավորված ըմպելիքների սիրահարների շրջանում վաղ մահվան ռիսկը 17 տոկոսով ավելի է, քան մյուսներինը: Միաժամանակ, խմիչքներում շաքարի փոխարինիչի առկայությունը չի փոխել իրավիճակը: