Ակտիվիստ Գեղամ Ադյանը տեղափոխվել է հիվանդանոց
Ակտիվիստ Գեղամ Ադյանը Արաբկիր ոստիկանության մոտից տեղափոխվել է «Սուրբ Գրիգոր Լուսավորիչ» ԲԿ: Այս մասին NEWS.am-ի հետ զրույցում ասաց ԲԿ տնօրենի տեղակալ Արտակ Մանուկյանը:
Տնօրենի տեղակալն ասաց, որ նա հայտարարում է` իրեն խփել են, սակայն ըստ դիագնոզի` նրա մոտ նեւրոտիկ ռեակցիա է, սրտի ռիթմի խանգարում:
Այժմ բուժզննում է իրականացվում, հիվանդի վիճակը գնահատվում է բավարար:
Ավելի վաղ հայտնել էինք, որ ԱԺ-ի մոտ Ամուլսարի շահագորման դեմ բողոքող 6 ակտիվիստներ են բերման ենթարկվել:
Հիշեցնենք, որ այսօր՝ օգոստոսի 19-ին, Բաղրամյան 26-ում վարչապետ Նիկոլ Փաշինյանը ՀՀ կառավարության անդամների, շահագրգիռ գերատեսչությունների ղեկավարների, Ջերմուկ համայնքի ավագանու անդամների, Գորայք, Զառիթափ, Ջերմուկ համայնքների բնակիչների, կրթական եւ առողջարանային հաստատությունների ներկայացուցիչների, բնապահպանների հետ քննարկել է Ամուլսարի հանքի շահագործման հարցը:
Միաժամանակ Բաղրամյան 26-ի դիմաց բողոքի ակցիա էր ընթանում ընդդեմ Ամուլսարի հանքի շահագործման: Բողոքի ակցիայի մասնակիցներն ավելի ուշ ցանկացել են հանրային քննարկում անցկացնել ԱԺ այգում, սակայն նրանց դա թույլ չեն տվել: Քաշքշոց է սկսվել ակցիայի մասնակիցների եւ ոստիկանների միջեւ, կարմիր բերետավորները բռնի ուժ կիրառելով բերման են ենթարկել ցուցարարներին, այդ թվում բնապահպաններ Անի Խաչատրյանին, Գեղամ Ադյանին: Քաշքշոցի ընթացքում գետնին է տապալվել քաղակտիվիստ, իրավապաշտպան Զարուհի Հովհաննիսյանը: