Հանրայինի հավատ չներշնչող պատճառաբանությունները
Հայաստանի Հանրային հեռուստաընկերությունը 7-րդ Համահայկական խաղերի բացման արարողությունը ուղիղ եթերում չի հեռարձակել իբր տեխնիկական պատճառներով:
«Շարժական հեռուստակայանը, որի միջոցով իրականացվում է նման միջոցառումների ուղիղ հեռարձակումը, անսարքություններ ունի, ինչի հետեւանքով Հայաստանի հանրային հեռուստաընկերությունը օգոստոսի 6-ին հնարավորություն չի ունեցել ուղիղ եթերում հեռարձակելու Ստեփանակերտում 7-րդ Համահայկական խաղերի բացման արարողությունը: Ներկայումս իրականացվում են նորոգման աշխատանքներ: Հանրային հեռուստաընկերությունը բացման արարողությունը լուսաբանել է լուրերի թողարկումներում, ինչպես նաեւ «Facebook»-յան էջի ուղիղ եթերում»,- նշված է Հանրային հեռուստաընկերության տարածած հայտարարության մեջ:
Հանրայինի արդարացումները, մեղմ ասած, հավատ չեն ներշնչում, քանի որ մեկ օր առաջ նույն Հայաստանի Հանրային հեռուստաընկերությունում տեխնիկական խնդիրներ չէին առաջացել Ստեփանակերտում Հայաստանի վարչապետ Նիկոլ Փաշինյանի նախաձեռնած հանրահավաքը ուղիղ եթերում հեռարձակելիս:
Ավելին, Հանրայինը նշում է, որ տեխնիկական խնդիրների պատճառով միջոցառման ուղիղ հեռարձակումը փոխանցվել է «Արմենիա» հեռուստաալիքին, սակայն մեր ունեցած հավաստի տեղեկություններով խաղերի կազմակերպիչները «Արմենիա» հեռուստաընկերության հետ վաղուց են ունեցել կոմերցիոն պայմանավորվածություն, ընդ որում, բավական լավ պայմաններով։
Հերթական անգան Հանրայինը, որը սնվում է մեր փողերով, ապացուցեց, որ կարեւորում է անկարեւորը եւ չի կարեւորում կարեւորը:
ԱննաԲաղդասարյան
Top-News.am