ՌԴ-ում հայը սիրելի կնոջ առեւանգման միջոցով որոշել է վերականգնել հարաբերությունները (ֆոտո)
Քննիչները քրեական գործ են հարուցել մարդու առեւանգման վերաբերյալ ոստիկանություն ներկայացված դիմումից հետո այն մասին, որ Լենինգրադի մարզի Վսեվոլոժսկի շրջանում առեւանգվել է մանկապարտեզի տնօրենը:
ՌԴ ՔԿ տարածաշրջանային վարչության մամուլի ծառայությունը հայտնել է, որ կնոջը հաջողվել է ազատվել եւ տուն վերադառնալ, հաղորդում է ՏԱՍՍ-ը:
«Քրեական գործ է հարուցվել ՌԴ ՔՕ 126-րդ հոդվածի 2-րդ մասի «վ» եւ «գ» կետերով («Կյանքի եւ առողջության համար վտանգավոր, զենքի եւ բռնության կիրառմամբ առեւանգում»)», - ասվում է գերատեսչության հաղորդագրությունում:
Քննության վարկածով կնոջն առեւանգել է նրա կենակիցը, որը հայաստանցի է: Նա ներխուժել է Յանինո-1 գյուղի նրա տուն եւ բռնության եւ զենքի կիրառմամբ նրան տնից դուրս հանել, մեքենա նստեցրել եւ տարել՝ պահանջելով շարունակել նրա հետ ապրել: ՔԿ-ում նշել են, որ կնոջը հաջողվել է ազատվել՝ համոզելով առեւանգողին:
Ոստիկանություն է դիմել առեւանգվածի դուստրը, որը պատմել է, որ իր մորը բռնի ուժով նստեցրել են Cadillac ավտոմքենա եւ տարել անհայտ ուղղությամբ: Ոստիկանությունը սկսել է խուզարկությունը:
8 տարի նրան առեւանգում եմ, հանուն սիրո Արարատ կբարձրանամ
Գործարար Հայկ Սիմոնյանը սիրելիին՝ Աննային,Cadillac-ով տարել է սրճարան, որպեսզի խոսի նրա հետ:Սակայն կնոջ դուստրը հայտնել է մանկապարտեզների հայտնի ցանցի տնօրենի առեւանգման մասին:
«Ես սիրում եմ նրան եւ նրան կորպորացիա եմ նվիրել», - ասել է ձենարկատերը:
47news-ին հայտնի է դարձել, որ օգոստոսի 5-ի երեկոյան Յանինոյում «Լիմպիկ» մանկապարտեզների ցանցի 44-ամյա տնօրեն Աննա Ամոսովային առեւանգել է Վսեվոլոժսկի շրջանի Նովոսարատովկա գյուղից գործարար Հայկ Սիմոյյանը:
Թղթակցի զանգի ժամանակ օգոստոսի 6-ի ցերեկը Հայկը իր ավտոմքենայով մոտենում էր Վսեվոլոժսկի ոստիկանություն: Բաժին ներկայանալ Հայկին դրդել էր ոչ միայն զանգը, այլեւ առավոտյան լուրերը: Դրանք պատմում էին Cadillac GMX322 ավոտմեքենայի որոնման մասին, որի մեջ տղամարդը նստեցրել եւ տարել էր մանկապարտեզի տնօրենին: Նա ճանաչել էր ինքն իրեն:
Գործարարը միանգամից հայտնել էր, որ Աննա Ամոսովան ողջ եւ առողջ է, գիշերը նա անցկացրել է տանը, իսկ նա նրան խելահեղ սիրահարված է:
«Նրա հետ 8 տարի ապրում եմ եւ այդքան ժամանակ էլ առեւանգում եմ: Դա սեր է սեր: Ես դրական եմ տրամադրված: Մենք՝ հայերս հանուն սիրո Արարատ լեռ կբարձրանանք», - ասել է Սիմոնյանը:
Նրա բացատրությամբ՝ երեկ երեկոյան իր եւ Աննայի միջեւ իսկապես վիճաբանություն է ծագել, եւ նա որոշել է այն կարգավորել սրճարանում դեմ առ դեմ հանդիպմամբ: Վեճը լուծելով՝ տղամարդը տիկնոջը վերադարձրել է Յանինո: Բայց նախաձեռնություն է դրսեւորել մանկապարտեզի տնօրենի 22-ամյա դուստրը՝ Վլադիսլավան, Կուդրովոյում Muzeus ինտերակտիվ սրճարանի կառավարիչը, որը նույնպես մտնում է «Լիմպիկ» խմբի կառուցվածքի մեջ: Նախնական տեղեկություններով՝ նա ոստիկանություն է զանգահարել եւ հայտնել, որ իր մորն առեւանգել է նախկին ընկերը:
Սիմոնյանը խոստովանել է, որ սիրելի կնոջ դստեր հետ իր հարաբերություններն իսկապես հարթ չեն: Երկու տարի առաջ ինքը ստիպված էր «կոպիտ խոսել» նրա ընկերոջ հետ: Դրանից հետո չարություն է առաջացել: Ձեռնարկատերը հայտարարել է, որ հաստատ մտադիր է Աննայի հետ ընտանիք կազմել, դրանից բացի, նա իրենից երեխայի է սպասում:
Տղամարդը հայտարարել է, որ բազմիցս Աննային օգնել է դուրս գալ ծանր վիճակներից, մասնավորապես՝ օգնել է բնակարանային խարդախների հետ կապված հարցում, իսկ «Լիմպիկ» մանկապարտեզների ցանցի սեփականատեր է դարձել իր շնորհիվ:
«Կարելի է ասել, որ «Լիմպիկը» ես եմ ստեղծել սիրելի կնոջ համար: Այնտեղ բոլորը ինձ սիրում են: Դա փաստ է: Չէ՞ որ այն նախկինում եղել է Alex Fitness-ի՝ Ալեքսեյ Կովալյովի ֆիթնես ակումբների ցանցի սեփականությունը: Այնտեղ են նաեւ Մագինը եւ Կուլիկովը: Նրանք կորպորացիան ինձ զիջեցին, իսկ ես այն նրան նվիրեցի: Այս մասին ե՛ւ Alex Fitness-ը գիիտի, ե՛ւ «Ստրոյտրեստը», ե՛ւ «Օտդելստրոյը»: Ամեն ինչ սիրելի կնոջ համար եմ անում»,- հայտարարել է Սիմոնյանը:
«ՍՊԱՐԻԿ Ինտերֆաքս» համակարգի տեղեկությունների համաձայն՝ այսօր Աննա Ամոսովան «Լիմպիկ մանկական կորպորացիա» ԲԲԸ-ի եւ «Լիմպիկ գրուպ» ԲԲԸ-ի միակ սեփականտերն է ու գլխավոր տնօրենը: Նրան է պատկանում նաեւ կրթական «Մանկության ակադեմիա» ԲԲԸ-ն: Բիզնեսվումենը «Օկերվիլ մանկաբուժական կենտրոն» ԲԲԸ-ի հիմնադիրների թվում է: Մինչեւ 2015 թվականը «Լիմպիկ գրուպ» ԲԲԸ-ն 100 տոկոսով պատկանել է Ալեքսեյ Կովալյովին՝ Alex Fitness հոլդինգի նախագահին եւ հիմնադրին:
Անմիջաբար Հայկ Սիմոնյանին է պատկանում «Մելինա» առեւտրային ընկերության կեսը, որը գրանցված է Վսեվորլժսկու շրջանի Սվերդլովի անվան գյուղում:
Հիշեցնենք, որ օգոստոսի 5-ի երեկոյան վսեվոլժսկյան ոստիկանություն է դիմել Յանինոյի 22-ամյա բնակիչը՝ «Լիմպիկ» մանկապարտեզին կից սրճարանի կառավարիչը: Նա հայտնել է, որ իր 44-ամյա մորը, որը մանկապարտեզի տնօրենն է, Cadillac GMX322-ում քաշքշել է նրա նախկին 37-ամյա կենակիցը: