Ճապոնիայում մեկ րոպե լռությամբ հարգանքի տուրք են մատուցել Հիրոսիմայի ատոմային ռմբակոծության զոհերի հիշատակին
Երեքշաբթի Ճապոնիան մեկ րոպե լռությամբ հարգանքի տուրք է մատուցել Հիրոսիմայի ատոմային ռմբակոծության զոհերի հիշատակին, որը 74 տարի առաջ տասնյակ հազարավոր մարդկանց կյանքն էր խլել: Ներկայումս հիշատակի արարողությունն ընթանում է Հիրոսիմայի կենտրոնում Խաղաղության այգում, փոխանցում է ՏԱՍՍ-ը:
Ըստ ավանդույթի՝ ամբողջ երկրում մեկ րոպե լռությունը հայտարարվել է տեղական ժամանակով ուղիղ 08:15-ին՝ այն պահին, երբ 1945 թվականի օգոստոսի 6-ին Հիրոսիմայի վրա պայթեց ռումբը: «Մենք, որպես ատոմային ռմբակոծություն վերապրած միակ երկիր, պետք է ամեն ինչ անենք, որպեսզի համանման ողբերգությունը այլեւս երբեք չկրկնվի»,- իր ելույթում նշել է Հիրոսիմայի քաղաքապետ Կաձումի Մացուին:
Մացուին նաեւ Ճապոնիայի կառավարությանը կոչ է արել վավերացնել միջուկային զենքի արգելման մասին ՄԱԿ կոնվենցիան, որն ընդունվել է 2017 թվականին: «Ես ցանկանում եմ, որ Ճապոնիայի կառավարությունը գիտակցի ատոմային ռմբակոծությունը վերապրած մարդկանց ցանկությունը, որոնք հանդես են գալիս այդ կոնվենցիայի վավերացման օգտին»,- ընդգծել է նա: Հիրոսիմայի քաղաքապետը մեջբերում է կատարել Մահաթմա Գանդիից՝ ասելով, որ ցանկացած գործի համար պայքարն առաջին հերթին պահանջում է սրտացավություն եւ համբերություն:
Հիրոսիմայի վարչակազմը հայտնել է, որ այս տարի արարողությանը մասնակցում են 95 երկրների եւ Եվրամիության ներկայացուցիչներ, մասնավորապես՝ դիվանագետներ միջուկային տերություններ Ռուսաստանից, Մեծ Բրիտանիայից, Ֆրանսիայից: Չինաստանի եւ Հնդկաստանի ներկայացուցիչները հիշատակի միջոցառումներին չեն մասնակցում, մինչդեռ Մալթան առաջին անգամ պատվիրակ է ուղարկել: Հրավերք են ստացել ընդհանուր 157 երկրներ:
Լուրեր Հայաստանից - NEWS.am