«Արտ Լանչը» սկսեց ՊՆ զորամասերից 2-ում ճաշարանների շահագործումը
«Արտ Լանչը» սկսեց ՊՆ զորամասերից 2-ում ճաշարանների շահագործումը. ՖՈՏՈՇԱՐՔ
Բակուր Մելքոնյանն իր ֆեյսբուքյան էջում գրել է.
«Մի քանի օր առաջ Արտ Լանչը սկսեց ՊՆ զորամասերից 2-ում ճաշարանների շահագործումը: Սա այն հազվագյուտ դեպքերից է, երբ արածդ պարզապես բիզնես չէ՜, երբ հացդ զինվորն է ուտելու:
Սա մեր համար պատվի խնդիր է:Մտածում էի վերադառնամ, նոր գրեմ այս մասին, բայց այս մի քանի օրվա մեջ այնքան շնորհակալություններ ենք ստացել մեր զինվորներից, որ չէի կարող չկիսվել:
Զինվորներից շատերը հարցրել են մեր խոհարարներին. «էս հետո էլ ա ըսենց համով ու բազմազան լինելու, թե՞ սկիզբն ա դրա համար ա...» Պատասխանում եմ՝ նոր ենք դրա համար ա ըսենց, կամաց-կամաց ավելի լավ ա լինելու:
Գործընթացը շարունակական է, ամիսը մի քանի զորամասերի ճաշարաններ կանցնեն նույն մեթոդի:
Աշխարհի զարգացած և հզոր բոլոր երկրների բանակներում զինվորի հացը վստահված է մասնավորին: Ի՞նչ առավելություն կա, նշեմ կարևորագույները՝ որակի բարձրացում և տեսականու ընդլայնում: Հարց. չէ՞ր կարող կամ արդյո՞ք ցանկություն չուներ ՊՆ-ն ինքը լավացնելու որակը և տեսականին: Կարծում եմ չէր կարող և հետևյալ պատճառով, դա նույն է, որ Արտ Լանչը որակյալ մեքենաների տեխ սպասարկում անի (մենք մեր մեքենաները վստահում ենք տվյալ ոլորտի պրոֆեսիոնալներին): Նույն էլ բանակի սննդի հարցն է՝ կան այդ գործի պրոֆեսիոնալներ...
Փոքրիկ օրինակ բերեմ մեկ այլ առավելության:
Երբ պետական որևէ կարիքի համար պետք է սննդամթերք, ըստ օրենքի հայտարարվում է մրցույթ, որը բնականաբար ժամանակատար է՝ մինիմումը մեկ ամիս, որպեսզի բոլոր շահագրգիռ մատակարարները իմանան, հետո ուսումնասիրեն բոլոր հայտերը ու բնականաբար այդ գործընթացի ժամանակատարությունից ելնելով գնումը արվում է գոնե մի քանի ամսվա, եթե ոչ ամբողջ տարվա համար:
Մասնավորը այդ հարցում շատ ճկուն է, անընդհատ թարմ գնումներ, ինչի շնորհիվ մենյուի բազմազանությունը հեշտ հնարավոր է ապհովել՝ թարմ մրգերից կոմպոտ(սիրոպների փոխարեն), սեզոնային բանջարեղեններ, կանաչիներ, մեր սարերի բարիքներ...
Մի կարևորագույն առավելություն էլ՝ մարզերում գյուղատնտեսության զարգացում:
Ասեմ ավելին, արդեն հանդիպում եմ ունեցել ԱԺ խմբակցություններից մեկի ներկայացուցչի հետ սահմանմերձ գյուղերից գյուղմթերքների գնումը ապահովելու համար: Հանդիպել եմ նաև գյուղ. ոլորտի լավագույն մասնագետներիի հետ և արդյունքում այսօր ընթանում են լոգիստիկ կենտրոնների ստեղծման գործընթացները, որոնք կապահովեն գյուղացու և մեր միջև կապը:
Մեր առջև գլխավոր 2 նպատակ ենք դրել.
1.Ապահովել բարձր որակ և բազմազանություն:
2. Ճկուն գնումների շնորհիվ ապահովել մաքսիմալ տեղական արտադրանքի օգտագործում:
Վերջում պարզապես ավելացնեմ, որ այս գործընթացին մասնակցում են մեր նման պրոֆեսիոնալ մի քանի կազմակերպություններ և 2 տարվա ընթացքում բոլոր մեր զինվորները կունենան ավելի որակյալ, բազմազան և առողջ սնունդ:
Հ. Գ. Էնքան ոգևորված գրեցի, կարևորն էի մոռանալու՝ բոլոր զինվորական ճաշարանները վերանորոգելու ենք ըստ անհրաժեշտության, ամբողջությամբ փոխվելու է սպասքը, կահույքը, թարմացվելու են սարքավորումները:
Կից դնում եմ մեր կողմից սպասարկվող զորամասերից մեկի ճաշարանի ինքնասպասարկման հոսքագծի նկարները:
Բարի ծառայություն եմ մաղթում մեր բոլոր զինվորականներին»: