Վարկերիցս հազիվ եմ պրծել. հարցազրույց Ռաֆայել Երանոսյանի հետ
«Աշխարհը ցուրտ է ու խաբուսիկ է» համացանցային հիթին հաջորդեց մեկ այլ՝ ոչ պակաս հաջողության հասած հոլովակ՝ երգի կրկնօրինակումը Ռաֆայել Երանոսյանի կողմից:
ArmDaily.am-ը դերասանի հետ զրույցում պարզել է, թե ինչպես են ծնվում կրկնօրինակման գաղափարները:
«Նմանակման փոքրիկ հոլովակները իմ ներկայացումների գովազդների համար են արվում: Մենք պարզապես որոշել ենք տարբերվել և գովազդներն այդ կերպ անել: Ոչ մի նմանակման համար ինձնից երբեք չեն նեղացել, փորձում եմ այնպես անել, որ մարդու անձը չվիրավորեմ»,-ասում է դերասանը:
Մեր օրերում եթերից հնչող հումորին գնահատական տալ Ռաֆայել Երանոսյան չի ուզում, ասում է՝ դեռ փոքր է գնահատականներ տալու համար:
«Ես էլ ժամանակի հետ գնում եմ, ունեմ իմ սխալները, կամ գուցե դեռ նոր պիտի անեմ, դրա համար գնահատել չեմ կարող: Յուրաքանչյուր ժամանակ էլ ինչ որ բանի պակաս, ինչ-որ բանի լճացում կա: Այնպես չէ, որ հիմա միայն հումորային հաղորդումներում է որևէ բան պակաս: Կոֆեի մեջ պեսոկի պակաս կարա լինի, հազար ու մի բանի պակաս կա: Ժամանակի թելադրանքն է: Մի պահ շատ տարածված էին սիթքոմները, հիմա արդեն չկան, քանի որ լճացած են, ուրիշ տիպի հաղորդումներ են: Չեմ կարող ասել ինչն է շատ, ինչը քիչ մեր հումորայաին հաղորդումների մեջ, միջին գնում է: Չնայած ես հեռուստացույց գրեթե չեմ էլ նայում, քանի որ զբաղված եմ շատ: Գիտեմ որ շատ են սերիալները, ու դրանց վերնագրերը որ լսում եմ ուզում եմ պոռթկամ, քանի որ մեկ-մեկ շատ «ուժեղ» վերնագրեր են, ծիծաղելի են ինձ համար»:
Դերասանն ասում է՝ չունի սիրելի կերպար, որին նեղ շրջանակում հաճախ է նմանակում.
«Իմ բոլոր կերպարներն ինձ համար սիրելի են, քանի որ դրանց հետ ես ժամանակ եմ անցկացնում, այդ կերպարների հետ ես ապրում եմ, դրանք դառնում են իմ առօրյան: Հնարավոր է նստած լինեմ մի տեղ, մի այնպիսի լուսավոր, հետաքրքիր կերպար տեսնեմ, որ սկսեմ նմանակել: Դրա համար չկա այնպիսի մի կերպար, որ ամեն անգամ հետս վերցնեմ գնամ հարսանիք: Տեղում, պահի տակ են ծնվում: Ցանկացած մարդու նմանակում էլ կարող եմ անել, ինձ Աստված տվել է այդ շնհորքը: Բայց դրանք պիտի ծնվեն ճիշտ ժամանակին ու ճիշտ տեղում, որպեսզի բում լինի: Իմ տետրերի մեջ այնքան մարդու նմանակում կա գրած, որ հիմա անեմ երևի մի 4-5 դահլիճ ներկայացում միայն նմանակումով ստացվի»:
Հարցին, թե արդյոք ինքն էլ ունի վարկեր, դրա համար գրեթե բոլոր հոլովակներում վարկերի մասին խոսում է, Երանոսյանը պատասխանեց.
«Ես այն երջանիկներից եմ, որ վարկ չունեմ: Վարկերիցս հազիվ եմ պրծել, ու խոսք եմ տվել ինձ որ էլ չեմ վերցնի: Բայց որ տեսնում եմ ազգի 78%-ը վարկի տակ է, փորձում եմ ազգի անունից խոսել: Ու որ ազգի 78%-ը վարկի տակ է, դա ներկայացումերից էլ եմ իմանում: Երբ խնդրում եմ որ ձեռք բարձրացնեն այն մարդիկ, ովքեր վարկ չունեն, 350 հոգանոց դահլիճից 15-20 հոգին է ձեռք բարձրացնում: Ազգի մի մասնիկն էլ ես եմ, պիտի դա բարձրաձայնեմ»: