Սուդանի նախկին նախագահին բանտից բաց են թողել մոր հուղարկավորությանը մասնակցելու համար
Սուդանի իշխանությունները թույլ են տվել Սուդանի նախկին նախագահ Օմար ալ Բաշիրին դուրս գալ բանտից, որպեսզի կարողանա մասնակցել մոր հուղարկավորությանը, գրում է սուդանյան «Ալ Սուդանի» թերթը՝ հղում կատարելով սեփական աղբյուրներին, տեղեկացնում է ՌԻԱ «Նովոստի»-ն։
«Սուդանի իշխանությունները թույլ են տվել բաց թողնել ձերբակալված նախագահ Օմար ալ Բաշիրին Քուբար բանտից՝ մոր հուղարկավորությանը մասնակցելու համար, որը մահացել է երկուշաբթի, Խարթումի հիվանդանոցում»,- գրում է թերթը։
Համաձայն պարբերականի տվյալների՝ ալ Բաշիրը դուրս է եկել երկրի պաշտպանության նախկին նախարար Աբդելռահիմ Մոհամադ Մուհիբի ուղեկցությամբ։ Հոգեհանգստի վայրում շատ ոստիկաններ են եղել։
Ականատեսների վկայությամբ՝ պետության նախկին ղեկավարը Համեդ գերեզմանատանը շրջապատված է եղել անվտանգության ծառայությունների աշխատակիցներով։
Սուդանում ռազմական հեղաշրջումը տեղի է ունեցել ապրիլի 11-ին, չորս ամիս տեւած ժողովրդական բողոքների ֆոնին։ Նախագահ Օմար ալ Բաշիրը հեռացվել է իշխանությունից, իսկ ավելի ուշ բանտարկվել։ Իշխանությունն իր ձեռքն է վերցրել բանակի ձեւավորած անցումային ռազմական խորհուրդը, որը հայտարարել է, որ մտադիր է երկու տարում ղեկավարությունը հանձնել ընտրված իշխանություններին։ Ընդդիմությունը չի համաձայնել զինվորականների պլանին եւ շարունակել է բողոքները։ Սուդանում սկսվել են բանակցություններ ռազմական խորհրդի եւ ժողովրդի ներկայացուցիչների միջեւ։ Հունիսի 3-ին Սուդանում իրավիճակի սրվելուց հետո, երբ զինվորականները ցրեցին Խարթումում ցուցարարների վրանաճամբարի մի մասը, ուժայինների հետ ընդդիմության բանակցությունները դադարեցվեցին։
Երկխոսությունը վերսկսվեց միայն Աֆրիկյան միության միջնորդների միջամտությունից հետո։ Ներկա պահին կողմերը պայմանավորվել են ձեւավորել Գերագույն կառավարող խորհուրդ՝ զինվորականների եւ քաղաքացիականների մասնակցությամբ, ինչպես նաեւ սահմանադրական հռչակագրի մասին բարդ քննարկումներ են վարում, որը փոխարինելու է հիմնական օրենքին անցումային շրջանի առաջիկա երեք տարում։
Բաժանորդագրվեք Top-News.am-ին Telegram-ում