Լրատվամիջոցներին տուգանում են քաղաքական դրդապատճառներով. Անժելա Թովմասյան
«Հայելի» մամուլի ակումբում ՀՀ երկրորդ նախագահ Ռոբերտ Քոչարյանի փաստաբանների ասուլիսից հետո ՀՌԱՀ-ը տուգանել է այն լուսաբանած մի շարք հեռուստաընկերությունների:
Ըստ պաշտոնական պատճառաբանության՝ լրատվամիջոցները խախտել են «Գովազդի մասին» ՀՀ օրենքի 15-րդ հոդվածի 5-րդ մասի պահանջը, այն է՝ լրատվական թողարկումների ընթացքում տարբեր ընկերությունների տարբերանշաններով գովազդ հեռարձակելը: Մասնավորապես հուլիսի 21-ի նիստում ՀՌԱՀ-ը որոշել է տուգանել «Արմնյուզ»-ին, «5-րդ ալիք»-ին և «Հանրային հեռուստաընկերությանը»՝ 300.000-ական դրամ: Քննարկումների տեղիք է տվել հատկապես «5-րդ ալիք»-ին տուգանելու որոշումը, սա արդեն նրանց երկրորդ տուգանքը կլինի , երրորդի դեպքում կարող են զրկվել լիցենզիայից: Նման վտանգի առաջ է կանգնած Հ2-ը ևս:
«Հայելի» մամուլի ակումբի նախագահ Անժելա Թովմասյանը «Փաստինֆո»-ի հետ զրույցում ասաց, որ այդ պաստառները, որոնց պատճառով լրատվամիջոցներին տուգանել են, որոշակի փոփոխություններով արդեն ավելի քան 10 տարի է, ինչ տեղադրված են ակումբում։
«Աննախադեպ է այսպիսի որոշումը: Սա ուղիղ կապ ունի Ռոբերտ Քոչարյանի փաստաբանների ասուլիսի հետ, սա եզրակացությունների տեղիք է տալիս: Հենց այդ օրն են մատնանշել։ Ընդ որում՝ այդ օրը մեր ասուլիսը լուսաբանել են մի շարք հեռուստաընկերություններ, ԶԼՄ-ներ, ինչու հենց այդ մի քանիսին են տուգանել: Ինչո՞ւ են կենտրոնացել հենց այդ լրատվամիջոցների վրա, այստեղ էլ է հարց առաջանում»,-ասաց Ա.Թովմասյանը:
Անժելա Թովմասյանը վստահ է՝ սրանք զգուշացնող քայլեր են, միտում կա խափանելու ակումբների և մասնավորապես «Հայելի» ակումբի գործունեությունը, ինչպես նաև լրատվամիջոցներինը, նրանց միջև կապը, համագործակցությունը:
«Մեր ակումբը բոլոր ժամանակներում բոլորին խոսելու հնարավորություն է տվել՝ թե՛ իշխանությանը, թե՛ ընդդիմությանը, հատկապես ընդդիմությանը, այսօր էլ նույն աշխատաոճը շարունակում է, օրվա իշխանություններին դա շատ լավ հայտնի է: Օրինակ՝ իրենք կարող են հիշել, որ ժամանակին՝ երբ իրենք էին մերժված, իրենք էին ընդդիմություն, իրենք էին փակված, հենց նույն ակումբը իրենց էր տալիս լայն հնարավորություն արտահայտվելու: Շատ սխալ աշխատաոճ են ընտրել»,-նշեց նա:
ՀՌԱՀ-ի որոշումը լրատվամիջոցները դատարանում բողոքարկելու հնարավորություն ունեն: Անժելա Թովմասյանը վստահ է՝ հեռուստաընկերությունները դատը կշահեն:
«Սրանով փորձեցին վախեցնել հեռուստաընկերություններին, սա այն քայլն է, որ ասում են՝ «այ, դուք էսպես՝ ուրեմն մենք էլ էսպես», ֆինանսական տուգանքները դրա համար ամենահարմար տարբերակն են: Իսկ այսօր պարզ է, թե լրատվամիջոցները ֆինանսական ինչ վիճակում են: Ըստ իրենց՝ տուգանելը ճանապարհներից մեկն է լրատվամիջոցի աշխատանքը խափանելու: Վստահաբար սրա տակ քաղաքական ենթատեքստ կա»,-ասաց նա՝ ավելացնելով, որ չեն պատրաստվում վահանակները հանել, քանի դեռ գովազդատուների հետ պայմանագրերի ժամկետները չեն լրացել: