Մինչ 2020 թվականի ավարտը Տավուշ գյուղում խմելու ջրի խնդիր չենք ունենալու. մարզպետ
Տավուշի մարզպետ Հայկ Չոբանյանը ծանոթ է մարզի Տավուշ համայնքի խմելու ջրի հետ կապված խնդիրին: Նա հիշեցրեց, որ ինքն էլ այդ համայնքից է և նկատեց, որ խնդիրը 30 տարի առկա է, սակայն այսօր փորձում են համակարգային լուծում տալ: Tert.am-ի հետ զրույցում մարզպետը շեշտեց, որ իրենք կազմել են հանձնաժողովներ, որոնք ուսումնասիրություններ են կատարել, մինչ ժողովրդի կողմից բարձրացված դժգոհությանը:
«Այս ամենի շրջանակներում մենք ունենք պլանավորված 21 ծրագիր և այսօր այդ ծրագրերի նախագծային, նախահաշվային գործընթացների մեջ ենք: Մեր նպատակն է, որ մեր բոլոր համայնքներում խմելու ջրամատակարարման որակը բերվի համապատասխան ստանդարտներ, որովհետև վերջին տարիների ընթացքում իրականացվել է անարխիկ եղանակով: Այս ծրագրերի մեջ մտնում է նաև Տավուշ համայնքի խմելու ջրի հետ կապված խնդիրը: 30 տարի է խնդիր եղել է, վերջապես հանձ ենք առել լուծելու և մինչ 2020 թվականի ավարտը Տավուշ գյուղում ջրի խնդիր չենք ունենալու»,- ասաց Չոբանյանը:
Մարզպետը նշեց, որ Տավուշի մարզում կան համայնքներ, որտեղ ջրի որակի հետ կապված խնդիր կա, թեպետ արտաքուստ թվում է, թե որևէ ջրի հետ կապված որևէ խնդիր չկա: Նա շեշտեց, որ իրենք ինտենսիվ աշխատանք են տանում նաև ջրի որակի բարձրացման հետ կապված:
«Մեզ պետք է, որ ջրամատակարարման համակարգը բերենք այնպիսի ստանդարտների, որ համապատասխան սպասարկող կազմակերպությունների կողմից սպասարկվեն: Վերջին տարիներին այն, ինչ կատարվել է խմելու ջրի համակարգի հետ, կատարվել է պարտիզանական եղանակով, այսինքն՝ համայնքը խնդիրը լուծել է հիմնականում բարերարների միջոցով»,- հավելեց մարզպետը:
Վերջինս նկատեց, որ ընդհանրապես հանրապետությունում խմելու ջրի մատակարարման խնդիրներն ավելի մեծ են ջրային կորուստների առումով՝ շուրջ 70 տոկոս է: Հայկ Չոբանյանը հույս ունի, որ Տավուշի մարզում կկարողանան խնդիրն ավելի արագ կարգավորել, քանի որ մարզի լեռները բավարար ջրային ռեսուրսներ ունեն:
«Զուգահեռ աշխատում ենք նաև ոռոգման համակարգի ուղղությամբ, որը լրացուցիչ դրական ազդեցություն է ունենալու խմելու ջրի ջրամատակարարման համակարգի վրա, ոչ միայն այն պատճառով, որ շատերը ոռոգում իրականացնում են խմելու ջրով՝ չունենալով ոռոգման համակարգ, այլև այն պատճառով, որ մենք ավելի բարձրադիր գոտիները ոռոգելով, ըստ էության, որոշակի առումով կավելացնենք ստորգետնյա ջրերի ծավալներ: Տավուշում առաջին ուսումնասիրությունը կատարվել է 3 ամիս առաջ, հետո հաշվարկներ են արվել, այսօր քննարկման փուլում է կառավարության հետ, առաջիկայում այս առումով հայտարարություն կանենք»,- ընդգծեց մարզպետը:
Միևնույն ժամանակ Հայկ Չոբանյանը վստահեցրեց, որ Տավուշի մարզում խմելու ջրի ջրամատակարարման առումով ինչ-ոչ վատ վիճակ կամ վիճակի վատթարացում առկա չէ:
«Ուզում եմ հասկանալի լինի, որ առաջիկա տարվա համար մենք կազմել ենք 21 ծրագիր, կան ծրագրեր, որոնք արդեն իրականացման փուլում են: Մենք այսօր այպիսի ծավալի խնդիրներ ենք լուծում, որ չունենք նախագծային ու շինարարական համապատասխան ռեսուրսներ: Զուգահեռ բանակցում ենք նախագծային ու շինարարական կազմակերպությունների հետ, որ ներգրավեն գործընթացում: Վերջերս 2 ճանապարհային տենդեռ ունեինք, որոնցից մեկը Մակարավանքի ճանապարհն էր, որը չեղյալ հայտարարվեց դիմում չլինելու պատճառով»,- եզրափակեց Հայկ Չոբանյանը: