Արդյո՞ք պարոն Ջհանգիրյանը տեղյակ է ինչ դիմում ենք մենք ներկայացրել ՄԻԵԴ. Արամ Վարդևանյան
Արդյո՞ք պարոն Ջհանգիրյանը տեղյակ է՝ ինչ դիմում ենք մենք ներկայացրել ՄԻԵԴ. այսօր հրավիրված ասուլիսի ժամանակ նման հարցադրում արեց սահմանադրագետ Արամ Վարդևանյանը՝ անդրադառնալով նախկին զինդատախազ Գագիկ Ջհանգիրյանի այն հայտարարությանը, թե Մարդու իրավունքների և հիմնարար ազատությունների եվրոպական կոնվենցիան իրավունք է տալիս դիմող պետությունների բարձրագույն դատական ատյաններին դիմել Եվրոպական դատարան կարծիք կամ տեսակետ ստանալու համար՝ միմիայն մարդու իրավունքների և հիմնարար ազատությունների հետ կապված հարցերի բովանդակության առումով:
Նշենք, որ Ջհանգիրյանը ասել էր, որ ո՛չ դատարանը, ո՛չ Ռոբերտ Քոչարյանի պաշտպանները Սահմանադրական դատարանին նման խնդրով չեն դիմել, նրանք դիմել են՝ քննելու Քրեական օրենսգրքի 301-րդ հոդվածի համապատասխանությունը մեր գործող Սահմանադրության հետ: «Ո՞ւր է էստեղ մարդու իրավունքների, հիմնարար ազատությունների կոնվենցիայի հետ կապված խնդիրը»,-ասել էր Ջհանգիրյանը:
Վարդևանյանը ծանոթացրեց դիմումին և ասաց, որ իրենք դիմումով մի քանի խնդիր են ներկայացրել՝ որոշակիություն, կանխատեսելիություն, անձի անձնական ազատության իրավունք, արդար դատաքննության իրավունք. «Որովհետև եթե նորմն այնքան անհստակ է, ինչքան այս դեպքում 300.1-րդ հոդվածն է, այն զուտ Սահմանադրության համապատասխանության խնդիր չի առաջացնում, այն նաև հենց կոնվենցիայի 5-րդ և 6-րդ հոդվածի ակնհայտ խախտման ռիսկ է պարունակում»:
Ըստ նրա՝ արդար դատաքննություն ակնկալել անորոշ նորմի դեպքում հնարավոր չէ:
«Ի վերջո, մեր Սահմանադրությունը սինխորնիզացված է Եվրոպական կոնվենցիայի հետ»,-նշեց նա:
Բաժանորդագրվեք Top-News.am-ին Telegram-ում