«Սանիթեքը» ոչինչ չի անում և քաղաքային իշխանությանը փաստի առաջ է կանգնեցրել, ավելին՝ պատերազմ են հայտարարել միմյանց. Վ. Խաչատրյան
Երևանի համար առաջնահերթ խնդիրն աղբահանությունն է. այսօր հրավիրված ասուլիսին նման տեսակետ հայտնեց Երևանի նախկին քաղաքապետ Վահագն Խաչատրյանը՝ ամփոփելով քաղաքային իշխանության մեկ տարվա աշխատանքը։
«Ամառվա այս շոգին առավել քան զգում ենք դա, երբ տուրիստները քաղաքում շատ են, լրացուցիչ ծանրաբեռնվածությամբ պետք է աշխատի քաղաքի մաքրությամբ զբաղվող կառույցը, սակայն պարզվում է, որ նման կառույց չկա»,- ասաց նա և նշեց, որ «Սանիթեքը», ըստ էության, ոչինչ չի անում և քաղաքային իշխանությանը փաստի առաջ է կանգնեցրել:
«Ավելին՝ պատերազմ են հայտարարել մեկը մյուսին, դատի են տալիս միմյանց, արդյունքում տուժում է քաղաքացին»,- ասաց նա և նշեց, թե պատճառն այն է, որ ժամանակին համապատասխան ձևով մրցույթ չեն անցկացրել և արդյունքում շահել է մի կազմակերպություն, որը ոչ մի ձևով նախկինում հայտնի չի եղել որպես աղբահանություն իրականացնող կառույց:
Վաչագան Խաչատրյանը վստահ է, որ քաղաքապետ Հայկ Մարությանը և ամբողջ աշխատակազմն այն մարդիկ են, որոնք սրտացավ են և ամեն ինչ անում են որպեսզի օր առաջ այս վիճակից դուրս գան, բայց դեռ չի ստացվում:
Ըստ նրա՝ քաղաքային իշխանությունը պետք է հրապարակի «Սանիթեքի» հետ պայմանագիրը՝ հասկանալու համար, թե ով է ի վերջո այս վիճակի համար պատասխանատու։ «Չգիտեմ, թե ինչ հանգամանքերից ելնելով չի անում»,- ասաց նա և նշեց, որ քաղաքապետարանից ասում են, թե պայմանագրի պահանջները չեն կատարվում, «Սանիթեքն» էլ ասում է, որ աղբամանները կոտրում են:
Ըստ Խաչատրյանի՝ չնայած աղբահանության համար արվող վճարների մասին չի խոսում, ինքը հաշվարկել է և համոզվել, որ բավական լուրջ վճարումներ են արվում:
Նա նաև նշեց, որ «Սանիթեքը» վարկեր է վերցրել, պարտքերի մեջ խրվել, իսկ աղբատար ավտոմեքենաների, աղբամանների՝ հայտարարված քանակը չի համապատասխանում իրականությանը, դրանք ավելի քիչ են։
Վահագն Խաչատրյանը նշեց, որ խնդրի լուծման համար մեկ տարբերակ գտել են՝ պետք է քաղաքային իշխանությունն իրականացվի աղբահանություն, սակայն նա նշեց, որ դա իր համար ընդունելի չէ։
«Ես միշտ ասել եմ, որ չի կարելի նման ծառայությունները պետությանը վստահել, ուղղակի պետք է նորմալ մրցույթ անցկացնել և դա պատվիրակել մի որևէ կառույցի։ Բայց, անելանելի վիճակից ելնելով, քաղաքային իշխանությունը որոշել է «ԿամԱզ»–ները բերել, որ ասեն՝ մեքենաները չի հերիքում, «Սանիթեք»–ն էլ ասի՝ խնդրեմ, վերցրեք»,- ասաց նա և նշեց, որ հեռու պետք չէ գնալ, կարող են Թբիլիսիի փորձն ուսումնասիրել, թե ոնց են աշխատում, որ այնտեղ աղբ չես տեսնում:
Վահագն Խաչատրյանը նաև խոսեց Երևանի բնակֆոնդի մասին՝ նշելով, որ այն անմխիթար վիճակում է։ «Սկսած այն ժամանակներից բնակֆոնդի հետ ինչ փորձարկումներ ասես, որ չարեցին, գազիֆիկացում, էլեկտրաֆիկացում, ամենաայլանդակ միջամտությունը՝ կետային քաղաքաշինական լուծումներ: Փոխանակ բակային տարածքներն ավելացնեն, բարձրահարկ շենքեր կառուցեցին, և այդ ամենի հեղինակը Նարեկ Սարգսյանն էր, որը պատասխանատու էր քաղաքաշինության համար»,– ասաց նա՝ ավելացնելով, որ այդ մարդիկ պետք է պատասխանատվության ենթարկվեն։
«Այս օրերին երբ մի քիչ ջերմաստիճանը բարձրանում է տրանսպորտային կոլապսի մեջ ենք հայտնվել, շարժվելու տեղ չկա, մարդիկ չեն էլ կարողանում երեկոյան ժամերին դուրս գալ բակ, մի քիչ թարմ օդ շնչել, բեռ է, որ կուտակվել է և եկել է այսօրվա իշխանության ուսերին: Չեմ նախանձում այն մարդկանց, որոնք կգան ընտրությունների ճանապարհով և կսկսեն ղեկավարել քաղաքը, խոսեք քաղաքային իշխանության հետ, կխոստովանեն, որ չեն էլ պատկերացնում, որ նման պատմությունների մեջ կհայտնվեն»,-ասաց նա: