ԱՄՆ Կոնգրեսում ասել են, որ եկել է Թրամփին իմփիչմենթ հայտարարելու ժամանակը
Երկուշաբթի դեմոկրատները Կոնգրեսի Ներկայացուցիչների պալատ են ներկայացրել բանաձեւի նախագիծ, որով դատապարտում են նախագահ Դոնալդ Թրամփին այն արտահայտությունների համար, որոնք նրանք համարում են ռասիստական, տեղեկացնում է ՌԻԱ «Նովոստի»-ն՝ հղում կատարելով Politico պարբերականին։
Բանաձեւում առաջարկվում է «դատապարտել ռասիստական մեկնաբանությունները՝ ուղղված Կոնգրեսի անդամների դեմ»։
Բանաձեւը, որը ներկայացրել է Նյու Ջերսիից դեմոկրատ Թոմ Մալինովսկին, կարող է քվեարկության դրվել երեքշաբթի, նշում է պարբերականը։
Բանաձեւը որեւէ իրավաբանական հետեւանք չի ունենա Թրամփի համար։
Ավելի վաղ Թրամփը Թվիթերում գրել էր, որ Կոնգրեսում «առաջադեմ» կին դեմոկրատները եկել են այն երկրներից, որոնց իշխանությունները «լիակատար աղետ են, «հիմա նրանք բարձրաձայն ԱՄՆ մարդկանց՝ ամենամեծ ու ամենաուժեղ ազգին Երկրի վրա, ասում են, թե ինչպես պետք է կառավարել»։ Նա առաջարկել է նրանց հետ գնալ եւ «օգնել վերականգնել լիովին ավերված եւ հանցագործությամբ լցված այն վայրերը, որտեղից եկել են»։ Ավելի ուշ նա ավելացրել է, որ եթե մարդիկ «դժգոհ» են ԱՄՆ-ում տեղի ունեցողից, «կարող են հեռանալ»։ Ներկայացուցիչների պալատի խոսնակ Նենսի Փելոսին նման արտահայտություններն անվանել է այլատյացություն։ Խումբը, որի հասցեին արտահայտվել է Թրամփը (Ռաշիդա Թլաիբ, Ալեքսանդրիա Օկասիո-Կորտես, Այանա Փրեսլի եւ Իլհան Օմար) մամուլի ասուլիս է հրավիրել՝ նախագահի իմփիչմենթի կոչ անելով։ Նշված պատգամավորներից միայն Օմարն է ծնվել արտասահմանում՝ Սոմալիում, մյուսները ԱՄՆ քաղաքացիներ են այնտեղ ծնվելու իրավունքով։