«Ճիշտ ուղղություն ենք ընտրել. կարծում եմ՝ շուտով լավ նորություններ կունենանք». Սարհատ Պետրոսյանը՝ Սան Դիեգոյում
Սան Դիեգոյում շարունակվում է Երկրատեղեկատվական համակարգերի (GIS) ծրագրային ապահովման միջոցներ արտադրող համաշխարհային առաջատարի՝ Esri-ի (Environmental Systems Research Institute) ամենամյա աշխատաժողովը, որին Հայաստանից մասնակցում են ՀՀ անշարժ գույքի կադաստրի կոմիտեի ղեկավար Սարհատ Պետրոսյանը եւ տեղակալ Լեւոն Մելիքյանը։ Հավաքի կարգախոսն է՝ «GIS. բանական եւ զգայական համակարգ»։
Աշխատաժողովի շրջանակում հրավիրված Ազգային կառավարական գործադիր ֆորումի (National Government Executive Forum) ավարտին Սարհատ Պետրոսյանը փոխանցեց՝ հերթական անգամ պարզ դարձավ, որ ՀՀ անշարժ գույքի կադաստրի կոմիտեն գործունեության ճիշտ ուղի է ընտրել.
«Մենք՝ միգուցե ենթագիտակցական մակարդակով ու, բնականաբար, նաեւ որոշակի մասնագիտական փորձի հիման վրա, եկել ենք համոզման, որ Հայաստանի կադաստրի համակարգում մեր նախատեսած բարեփոխումները ոչ միայն արդիական են ու այլընտրանք չունեն, այլեւ առավելագույնս համապատասխանում են այլ երկրներում տարվող քաղաքականությանը։ Հիմա ավելի քան վստահ եմ, որ արագ արդյունքներ ապահովող եւ ճիշտ ուղղությամբ ենք շարժվում։ Այնպես որ, կարծում եմ՝ շուտով լավ նորություններ կունենանք»։
Աշխատաժողովի մասնակից երկրների կառավարությունների, միջազգային կազմակերպությունների ներկայացուցիչները եւ փորձագետներն այս ֆորումում քննարկում են երկրատարածական համակարգերի կիրառմանը եւ զարգացման հեռանկարներին վերաբերող հարցեր։
Esri ընկերության ներկայացուցիչ Կարստեն Բյոռնսոնը (Սարհատ Պետրոսյանի հետ կից լուսանկարում) աշխատաժողովին մասնակցելու հրավերը հայկական կողմին արել էր դեռ Երեւանում՝ Կադաստրի կոմիտեի ղեկավարների հետ հանդիպմանը։ Այդ հանդիպման նպատակը բանակցություններն էին, թե արդյոք երկրատեղեկատվական համակարգչային ծրագրերի ոլորտում աշխարհի առաջատար այս ընկերությունը կհամագործակցի՞ Հայաստանի կադաստրի կոմիտեի հետ՝ Ինտեգրված կադաստրի թվային հարթակների ստեղծման ու հետագա գործունեության շրջանում։ Վերջնական պայմանավորվածությունից առաջ Esri-ն պետք է իրավիճակի գնահատում անցկացնի եւ առաջարկներ մշակի։
Ինտեգրված կադաստրի ստեղծման ու գործունեության փուլերում Կադաստրի կոմիտեի աջակիցներն ու համագործակիցներն են նաեւ ամերիկյան, ճապոնական կազմակերպություններ, հայաստանյան համալսարաններ…