Վրաստանը հույս է հայտնել, որ Ռուսաստանն իր նկատմամբ առևտրային էմբարգո չի սահմանի
Վրաստանի շրջակա միջավայրի և գյուղատնտեսության նախարար Լևան Դավիթաշվիլին հույս է հայտնել, որ Ռուսաստանը երկրի նկատմամբ արտահանման և ներմուծման արգելքներ (էմբարգո) չի սահմանի, գրում է РИА Новости-ն:
«Մեր կառավարությունն ապացուցել է, որ պրագմատիկ քաղաքականությունը հնարավոր է: Տարածքային ամբողջականությունը մեզ համար առաջնահերթություն է, սակայն կարողացել ենք ինտենսիվ մշակութային և տնտեսական հարաբերություններ ստեղծել Ռուսաստանի հետ և հույս ունենք, որ այդ երկրի կողմից էմբարգո չենք ստանա: Մենք կկարողանանք շարունակել առևտրային հարաբերությունները, այդ թվում՝ գինու ոլորտում»,- ասել է նախարարը՝ կարևորելով, որ այդ հարաբերությունները հիմնված լինեն պրագմատիկ կապերի վրա և զերծ լինեն հույզերից:
Նա նաև հույս է հայտնել, որ Ռուսաստանը «ադեկվատ կերպով» կդիտարկի իրավիճակը:
Ավելի վաղ ՌԴ սպառողների իրավունքների պաշտպանության ոլորտում հսկողություն իրականացնող «Ռոսպոտրեբնադզոր» դաշնային ծառայությունը հայտնել էր Վրաստանում արտադրված և ՌԴ ներկրվող ալկոհոլային ապրանքների նկատմամբ հսկողությունն ուժեղացնելու մասին: Գերատեսչության տվյալներով՝ Վրաստանում արտադրված և ՌԴ ներկրված ալկոհոլի քանակը, որը չի համապատասխանում պարտադիր պահանջներին, 2014-2018թթ. ավելացել է 2,9 անգամ:
Հիշեցնենք, որ որ Ռուսաստանի ու Վրաստանի հարաբերությունները սրվել էին հունիսի 20-ի իրադարձություններից հետո, երբ ՌԴ պետդումայի պատգամավոր Սերգեյ Գավրիլովը, որը ներկա էր եղել Վրաստանում անցկացվող Ուղղափառության միջխորհրդարանական վեհաժողովի նիստին, նստել էր խորհրդարանի խոսնակի աթոռին և հավաքվածներին ռուսերենով ուղերձ հղել:
Հունիսի 20-ի գիշերը ցուցարարները փորձել էին գրոհել խորհրդարանի շենքը, որից հետո նրանց դեմ ռետինե փամփուշտներ և արցունքաբեր գազ էր կիրառվել, ինչի հետևանքով 240 մարդ տուժել էր: Բախումներից հետո 305 մարդ բերման էր ենթարկվել:
Բողոքի ցույցերի ֆոնին Վրաստանի նախագահ Սալոմե Զուրաբիշվիլին Ռուսաստանին «թշնամի» էր անվանել՝ մեղադրելով այդ երկրին Վրաստանում հանրային պառակտում ստեղծելու հարցում շահագրգռվածության համար:
ՌԴ նախագահ Վլադիմիր Պուտինը հրաման էր ստորագրել, որի համաձայն ռուսական ավիաընկերություններին արգելվում է օդային փոխադրումներ իրականացնել Ռուստաստանից դեպի Վրաստան՝ խորհուրդ տալով տուր-օպերատորներին տուր փաթեթներ չվաճառել դեպի Վրաստան, իսկ Տրանսպորտի նախարարությունը երկրի տարածքում վրացական ավիաընկերությունների չվերթները դադարեցնելու որոշում էր կայացրել: