Իմ վիճակը գնալով վատանում է. Ապրիլյան պատերազմի մասնակցին անհապաղ բուժօգնություն է հարկավոր
Ապրիլյան պատերազմի մասնակից 33–ամյա Հայկ Սեխլիյանին շտապ բուժում է անհրաժեշտ։ Նրա առողջական վիճակը գնալով վատթարանում է, իսկ բուժումը կարող են իրականացնել միայն արտասահմանում։
Հայկի խոսքով` մի քանի անգամ դիմել է վարչապետ Նիկոլ Փաշինյանին, բայց դեռ անարձագանք է մնացել։
«Վերջին հանդիպումը վարչապետ Նիկոլ Փաշինյանի հետ եղել է մոտ 2–3 ամիս առաջ՝ «Զինվորի տանը»։ Ասացի՝ պարոն վարչապետ, անցած տարի հունիսից ասացիք կարձագանքենք, բայց ոչ մի բան։ Վարչապետի հետ երկրորդ անգամ հանդիպմանը նաև ներկա է եղել Առողջապահության նախարարը, նամակ անձամբ Առողջապահության նախարարին էլ եմ տվել, բայց ոչ մի պատասխան չկա»,– ասաց Հայկը։
Նրա խոսքով՝ երեք տարիներ ընթացքում ոչ մի անգամ հանրային տարբերակով չի բարձրաձայնել խնդրի մասին, սակայն հիմա դանակը ոսկորին է հասել։
«Դեռ անցած տարի, երբ բեկորը մեկ սանտիմետր հեռու էր ողնուղեղից, բժիշկները խուսափեցին միջամտություն անել եւ խորհուդ տվեցին գնալ Շվեյցարիա։ Իմ վիճակը գնալով վատանում է, եւ մեկ օր շուտ գնալն իմ օգտին է»,– ասաց Հայկը։
Նրա խոսքվ՝ անգամ վիրավորումից հետո ինքն աշխատել է եւ տան վարձավճարն ու ընտանիքի կարիքները հոգացել։
«Ես միշտ փորձում եմ դժվարությունները ժպիտով հաղթահարել, եւ եթե այսօր կարողանում եմ աշխատել, ես դա անում եմ մեծ սիրով։ Ես պետությունից կամ որեւէ մեկից ակնկալիք չունեմ»,– ասաց Հայկը։
Հայկի ընկերները նրա անունով հաշվեհամար են բացել, որպեսզի գումար հավաքվի եւ օր առաջ նրան տեղափոխեն արտասահման։
Բաժանորդագրվեք Top-News.am-ին Telegram-ում
