Հունան Պողոսյանը պատրաստ է վեթինգի
Սյունիքի մարզպետ Հունան Պողոսյանը, որը նախկինում ՀՀ փոխոստիկանապետն էր, կողմ է վեթինգի գաղափարին։ ԱԺ-ում լրագրողների հետ զրույցում նա նշեց, որ ինքը որևէ մտավախություն չունի այդ կապակցությամբ։
«Մտավախություններ չունեմ ... ինքս էլ պատրաստ եմ ենթարկվել դրան: Իմ անձնական կարծիքով՝ դա նորմալ գաղափար է»,-ասաց նա։
Հունան Պողոսյանը պատասխանեց նաև ՀՀ վարչապետ Նիկոլ Փաշինյանի՝ «սևազգեստ» երիտասարդների հետ կապված հարցերին։
«Քրեածին-հանցավոր միջավայրի տարրեր միշտ եղել են ու կան, և դրանցով իրավապահները պետք է զբաղվեն: Նրանք պատշաճ մակարդակով իրենց գործառույթներն իրականացնում են»,- շարունակեց նա։
Ինչ վերաբերում է հարցին՝ արդյոք Սյունիքի մարզում սևազգեստներ կան, Հունան Պողոսյանը պատասխանեց, թե պետք չէ իրավիճակը ծայրահեղացնել։
«Հանդերձանքի և Սյունիքում իրավիճակի առումով պետք չէ ծայրահեղացնել: Գունավոր հանդերձանք կրողներ էլ կարող են լինել, որոնք փորձում են իրենց վեր դասել օրենքից: Դուք փորձում եք այլ կերպ մեկնաբանել, բայց կարծում եմ, որ այդ ամենը վերաբերում է բոլոր նրանց, ովքեր փորձում են օրենքից վեր դասել իրենց: Սյունիքում նման մտահոգություն կա, այդպիսի խմբավորումներ չկան»,- ընդգծեց Հունան Պողոսյանը։
Մարզպետը նաև պատասխանեց Սյունիքի նախկին մարզպետ Սուրիկ Խաչատրյանի մերձավորերի վարքի վերաբերյալ լրագրողներին հարցին՝ ասելով. «Ես չգիտեմ, թե ովքեր են նրա մերձավորները, ի՞նչ է, այլ կե՞րպ պետք է իրենց պահեն։ Իհարկե ոչ։ Բոլորն օրենքի սահմանում են ու դեռ ավելին»։