Քոչարյանի գործով դատավորը հրաժարվել է քննել Արամ Հարությունյանի պաշտպանների բողոքը
Բնապահպանության նախկին նախարար Արամ Հարությունյանի գործը վերաբացելու դեմ նրա պաշտպանների ներկայացրած բողոքը քննող դատավոր Դավիթ Գրիգորյանը այսօր՝ հունիսի 4–ին ինքնաբացարկ է հայտնել: Այս մասին NEWS.am–ին հայտնեց Հարությունյանի պաշտպանական խմբի անդամ Հրանտ Անանյանը։
Նա նշեց, որ երեկ դատավորը կողմերին իրազեկել է իր մտադրության մասին։ Մասնավորապես՝ դատավորը կասկածներ է ունեցել, որ այն հանգամանքը, թե ինքը քննել է նաեւ ՀՀ երկրորդ նախագահ Ռոբերտ Քոչարյանի գործը, կարող է խոչընդոտ հանդիսանալ գործի հետագա անկողմնակալ քննության համար:
Ըստ դատավորի` երկու գործերով էլ կա փոխկապակցված անձ, խոսքը գործարար Սիլվա Համբարձումյանի մասին է: Նա եւ՛ Քոչարյանի, եւ՛ Հարությունյանի գործով հանդիսանում է նրանց կաշառք տված անձ:
Նշենք, որ Դավիթ Գրիգորյանը Ռոբերտ Քոչարյանի գործով դատավորն է, նա մայիսի 20–ին որոշում է կայացրել Քոչարյանի եւ մյուսների գործի վարույթն ու այն ուղարկել Սահմանադրական դատարան։
Անանյանը տեղեկացրեց, որ դատավարությանը կողմերը հայտարարել են, որ դեմ չեն, որ նա քննի այս գործը, սակայն այնուամենայնիվ դատավորը վերադառնալով խորհրդակցական սենյակից՝ ինքնաբացարկ է հայտնել։
Հրանտ Անանյանի կարծիքով, սակայն , դատավորը որոշակի համոզմունք էր ձեւավորել, որ պաշտպանական կողմի ներկայացրած բողոքները ենթակա են բավարարման, ինչի պարագայում իր նկատմամբ դարձյալ հանրային ճնշում կլիներ։
Նշենք, որ պաշտպանական կողմը տեւական ժամանակ է դատարանից խնդրում է վերացնել Հարությունյանին եւ մյուս մեղադրյալներին առնչվող քրեական գործը վերաբացելու մասին որոշումը։
Ավելի վաղ ՀՔԾ–ն հայտնել է, որ առանձնապես խոշոր չափերով կաշառք ստանալու դեպքի առթիվ ՀՀ հատուկ քննչական ծառայությունում հարուցված քրեական գործի նախաքննությամբ ձեռք բերված բավարար ապացույցների համակցության հիման վրա Արամ Հարությունյանը որպես մեղադրյալ է ներգրավվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով եւ 190-րդ հոդվածի 3-րդ մասի 1-ին կետով նախատեսված հանրորեն վտանգավոր այն արարքների կատարման համար, որ նա, հանդիսանալով ՀՀ գործադիր իշխանության ղեկավար աշխատող, իր հետ մտերիմ հարաբերությունների մեջ գտնվող անձանց օժանդակությամբ առանձնապես խոշոր չափերով կաշառք է ստացել, ապա՝ օրինականացրել հանցավոր ճանապարհով ստացված առանձնապես խոշոր չափերով գույքը:
Նախկին նախարարն իր պաշտպանի միջոցով հայտնել էր, որ չի ընդունում առաջադրված մեղադրանքը։
Արամ Հարությունյանի նկատմամբ, որպես խափանման միջոց է ընտրվել կալանավորումը եւ նրա նկատմամբ հայտարարվել հետախուզում: