Պոմպեոն՝ իսրայելա-պաղեստինյան հնարավոր համաձայնության մասին
ԱՄՆ պետքարտուղար Մայք Պոմպեոն մտահոգված է, որ իսրայելա-պաղեստինյան հակամարտության կարգավորման «դարի գործարքը» կարող է «անիրականանալի» դառնալ, հայտնում է The Washington Post-ը:
Ըստ պարբերականի՝ հրեա առաջնորդների հետ փակ հանդիպման ժամանակ անգամ այս ծրագրի կողմնակիցները ակնկալում են, որ այն խորը հոռետեսությամբ կընդունվի:
Առաջարկի տնտեսական բաղադրիչները պետք է ներկայացվեն հունիսի 25-26-ը Բահրեյնում անցկացվող համաժողովում:
ԱՄՆ նախագահի փեսա Ջարեդ Քուշների առաջ քաշած երկար սպասված ծրագիրը պաղեստինցիներն արդեն մերժել են. նրանք ասում են, որ ԱՄՆ նախագահ Դոնալդ Թրամփի քաղաքականությունը ցույց է տվել, որ նա ակներեւորեն հակված է Իսրայելի կողմը:
Պոմպեոն ընդունել է ծրագրում Իսրայելի հանդեպ ենթադրյալ ֆավորիտիզմը, բայց հույս է հայտնել, որ այն, այդուհանդերձ, արդարացի կլինի:
«Ես հասկանում եմ, թե ինչու են մարդիկ մտածում, որ սա կլինի գործարք, որը դուր կգա միայն իսրայելցիներին,- The Post-ի փոխանցմամբ՝ ասել է նա: - Ես հասկանում եմ այսպիսի ընկալումը: Հույս ունեմ, որ նրանք բոլորը կլսեն եւ կհանդարտվեն»:
Լուրեր Հայաստանից - NEWS.am