ԱՄՆ մուտքի արտոնագիր ստանալու համար կպահանջվի հղում անել սոցցանցերին
ԱՄՆ պետդեպարտամենտն այսուհետ երկրի մուտքի վիզա ստանալու համար կպահանջի տալ սոցիալական ցանցերի հղումները: Այս մասին տեղեկացնում է lenta.ru-ն: Աղբյուրը հայտնում է, որ ԱՄՆ արտգործնախարարությունը թարմացրել է արտոնագրերի դիմումների ձևաթղթերը: Նոր օրենքն ուժի մեջ է մտել մայիսի 31-ից:
Այժմ ԱՄՆ մուտքի արտոնագրի համար դիմողների մեծ մասից պահանջվելու է սոցիալական ցանցերի օգտահաշիվը: Օգտատերերը, իհարկե, կարող են հայտնել, որ չեն օգտվում սոցիալական կայքերից, սակայն ոչ հավաստի տեղեկատվության համար նրանք կարող են պատժվել` մերժման տեսքով:
Պետդեպարտամենտը բացատրել է, որ նոր ձևաչափի շնորհիվ հնարավորություն կլինի հետևել ահաբեկիչներին և այն մարդկանց, որոնք հասարակության համար վտանգ են ներկայացնում: Նրանց ԱՄՆ մուտքի արտոնագիր ստանալու հայցը կմերժվի: