Ռոբերտ Քոչարյանը պետք է լինի ազատության մեջ
«Ռոբերտ Քոչարյանի եւ մյուսների» դատավարության առաջին իսկ օրերն ապացուցեցին, որ գործ ունենք մաշեցնող մի գործընթացի հետ, որը կարող է ոչ թե ամիսներ, այլ տարիներ տեւել: Ի՞նչ է պետք անել: Շաբաթ օրը՝ մայիսի 18-ին ՀՀ երկրորդ նախագահ Ռոբերտ Քոչարյանի խափանման միջոցը պետք է փոխվի: Նա պետք է լինի ազատության մեջ:
Դատական նիստերը տեւելու են երկար, շատ երկար, հոգնեցնող եւ մաշեցնող երկար, իսկ Ռոբերտ Քոչարյանի խափանման միջոցի փոփոխումը կթուլացնի, գուցե կվերացնի այն լարվածությունը, որն առկա է, եւ որը գնալով թափ է հավաքում:
Մեր երկրի հակառակորդները հրաշալի են օգտվում այս դատավարությունից, խորացնում հասարակությունում առկա պառակտումը, այն փորձում վերածել թշնամանքի, իսկ որ ամենավատն է՝ արհեստական բաժանում են մտցնում արցախցիների եւ Հայաստանի մյուս մարզերի բնակիչների միջեւ:
Սրան պետք է վերջ տրվի: Ռոբերտ Քոչարյանի խափանման միջոցը պետք է փոխվի, որից հետո հանրության համակ ուշադրության ներքո կշարունակվի դատավորությունը: Անշուշտ, մարտի 1-ի հետ առնչվող հիմնական հարցերից եւ ոչ մեկի պատասխանը մենք չենք ստանա, քանի որ մեղադրական կողմը բոլորովին այլ խնդիր է փորձում լուծել:
Հանրությունն այս դատավարության ընթացքում այդպես էլ չի ստանալու հետեւյալ հարցերի պատասխանները՝ ինչո՞ւ եղավ այս ողբերգությունը, ի՞նչ պետք էր անել արյունահեղությունից եւ ողբերգությունից խուսափելու համար, ով ինչ պատասխանատվություն ուներ, ով ինչ արեց ողբերգությունն արագացնելու կամ կանխելու համար:
Անկասկած, գալու է այն ժամը, երբ դատավարության մասնակիցները տեղերով փոխվելու են: Եւ եթե մենք կանգ չառնենք, չսթափվենք, մենք այդպես էլ մնալու ենք 2008թ. մարտի 1-ի մեջ եւ դուրս չենք գալու:
Իսկ առայժմ, մինչեւ վերջնական սթափվելը պետք է փոխել Ռոբերտ Քոչարյանի խափանման միջոցը: Պետք է փոխել ոչ միայն այն պատճառով, որ Ռոբերտ Քոչարյանը դատավորությունից խուսափելու որեւէ մտադրություն չունի եւ չի փորձելու ճնշում գործադրել վկաների վրա, այլ նաեւ մեկ այլ կարեւոր պատճառով:
Արցախի ներկա եւ նախկին նախագահները միջնորդել են, որ Ռոբերտ Քոչարյանն ազատ արձակվի: Միջնորդել են երկրորդ անգամ: Եւ եթե հանկարծ դատավորը ենթարկվելով ուղղակի եւ անուղղակի ճնշումների չփոխի խափանման միջոցը, ապա հարված կհասցնի մեր ժողովրդի մի հատվածին՝ արցախցիներին:
Ռոբերտ Քոչարյանը պետք է ազատության մեջ լինի, նրա խափանման միջոցը պետք է փոխվի: Սա բխում է մեր պետության եւ ժողովրդի շահերից: Դատավորը չպետք է տուրք տա աղմկարար, ղժղժան մի փոքրիկ խմբի աղմուկ-աղաղակին եւ պետք է առաջնորդվի իրավունքով եւ մեր պետության ու ժողովրդի շահերով:
Հակոբ Ասատրյան
Top-News.am