Ինչ է փոխվել Նիկոլ Փաշինյանի կյանքում վարչապետ դառնալուց հետո
ՀՀ վարչապետ Նիկոլ Փաշինյանը РБК-ի հետ զրույցում խոսել է այն մասին, թե վարչապետ դառնալուց հետո ինչ է փոխվել իր ընտանիքի կյանքում: Հարցին՝ ո՞վ է այստեղ՝ ՀՀ կառավարական առանձնատանը տնտեսությունը վարում, Փաշինյանը պատասխանել է.
«Դե, հասկանալի չէ՝ այստեղ ինչ է տեղի ունենում, քանի որ ամեն ինչ խառնվել է: Մեր կյանքի նախորդ փուլում ամեն ինչ պարզ ու հասկանալի էր՝ ո՞վ, որտե՞ղ, ե՞րբ ու ինչո՞ւ: Հիմա այնքան էլ հասկանալի չէ՝ ով ինչ է անում, քանի որ փաստացի չի կարելի ասել, որ մենք այստեղ ապրում ենք, մենք այստեղ պարզապես քնում ենք»:
«Որովհետև շա՞տ եք աշխատում»,- հետաքրքրվել է լրագրողը:
«Դե, այո, Աննան էլ է շատ աշխատում»,- ասել է ՀՀ վարչապետը:
Լրագրողը հիշեցրել է՝ Նիկոլ Փաշինյանը, երբ դեռ վարչապետ չէր, երբ սպորտային հագուստով էր շրջում, մի անգամ պատասխանելով հարցին՝ երբ դառնա վարչապետ, ինչպե՞ս կփոխվի նրա կյանքը արտոնությունների և այլնի առումով, հույս հայտնեց, որ շատ չի փոխվի:
«Դե, այդ առումով կարծում եմ՝ այդպես էլ եղավ, իսկ ի՞նչ արտոնություններ ունեմ այժմ»,- հարց է ուղղել Փաշինյանը:
Դիտարկմանը, թե՝ տպավորություն կա, որ եթե վարչապետ է, ուրեմն՝ հարուստ է, խոհարարներ ունի, խանութ չի գնում, Կառավարությանը ղեկավարը պատասխանել է.
«Մենք խանութ գնում ենք: Ոչ այնքան հաճախ, բայց գնում ենք: Ուտելիքներ պատրաստում ենք: Ինչ-որ միջոցառումների համար, իհարկե, կան խոհարարներ: Ապրում ենք այնպես, ինչպես ապրում էինք»: