Եթե դատավոր Դավիթ Գրիգորյանը չենթարկվի պատասխանատվության, շատ կասկածելի կլինի. Հայկ Ալումյան
ՀՀ երկրորդ նախագահ Ռոբերտ Քոչարյանի խափանման միջոցի հարցի քննությունը մայիսի 13-ին տեղի կունենա Երեւանի ընդհանուր իրավասության Նոր Նորքի դատարանում ժ. 14։00-ին։ Այս մասին «Փաստինֆո»-ն տեղեկացավ Քոչարյանի պաշտպան Հայկ Ալումյանից։
Օրեր առաջ Հայկ Ալումյանը նշել էր, որ իր կարծիքով՝ սխալ կլինի, եթե գործը շարունակի քննել դատավոր Դավիթ Գրիգորյանը։ «Փաստինֆո»-ի այն հարցին՝ արդյոք պաշտպանական կողմը պատրաստվո՞ւմ է ինքնաբացարկի միջնորդություն ներկայացնել, Հայկ Ալումյանը պատասխանեց. «Այս պահին այդ հարցը չենք ուզում մեկնաբանել»։
Ի պատասխան մյուս հարցին, թե օրեր առաջ ԲԴԽ-ում երկու դատավորի կարգապահական պատասխանատվության ենթարկվելը հնարավո՞ր է, որ կկաշկանդի դատավորներին այս գործի քննության ընթացքում, Հայկ Ալումյանն ասաց. «Կաշկանդվողը առիթ է փնտրում, որ կաշկանդվի, իսկ չկաշկանդվողը չի կաշկանդվում ամեն պարագայում»։
Հիշեցնենք, որ մայիսի 8-ին դատավորներ Նելլի Բաղդասարյանը եւ Հարություն Մանուկյանը ենթարկեցին կարգապահական պատասխանատվության՝ համապատասխանաբար ստանալով նկատողություն եւ նախազգուշացում։ ԲԴԽ-ն գտել էր, որ ինքնաբացարկ հայտնելով՝ Բաղդասարյանը թույլ էր տվել դատական վարքագծի կոպիտ խախտում, իսկ Մանուկյանը չէր իրականացրել օրենքով իրեն վերապահված լիազորությունները։
Նշենք նաեւ, որ ԲԴԽ-ն քննել է դատավոր Դավիթ Գրիգորյանին կարգապահական պատասխանատվության ենթարկելու հարցը, ինչի վերաբերյալ որոշումը հրապարակվելու է նույն օրը՝ մայիսի 13-ին. «Եթե նա չենթարկվի պատասխանատվության, շատ կասկածելի կլինի»,-«Փաստինֆո»-ի հետ զրույցում ասաց Ռոբերտ Քոչարյանի պաշտպան Հայկ Ալումյանը։