Մակրոնը և Մերկելը կոչ են անում չսրել վեճը Իրանի միջուկային խնդրի շուրջ
Ֆրանսիայի նախագահ Էմանյուել Մակրոնն ու Գերմանիայի կանցլեր Անգելա Մերկելը նախազգուշացրել են, որ կողմերը զերծ մնան Իրանի միջուկային խնդրի շուրջ վեճը սրելուց:
Պաշտոնական Թեհրանը երկու օր առաջ հայտարարեց, որ սառեցնում է 2015 թվականի միջուկային համաձայնագրի դրույթներից մի քանիսը և փաստաթուղթը կնքած կողմերին տալիս է «ամերիկյան պատժամիջոցները շրջանցելու ուղիներ փնտրելու ժամանակ»: Նույն օրը Իրանի հարցով Միացյալ Նահանգների բանագնաց Բրայան Հուքը մեղադրեց Թեհրանին վերստին «միջուկային շանտաժի» մեթոդին դիմելու մեջ: Վաշինգտոնը նոր պատժամիջոցներ սահմանեց Թեհրանի նկատմամբ՝ այս անգամ թիրախ դարձնելով մետաղագործության և հանքարդյունաբերության ոլորտները:
Այդուհանդերձ, ԱՄՆ նախագահ Դոնալդ Թրամփը հայտարարել է, թե բաց է Իրանի առաջնորդների հետ խոսելու համար:
Մակրոնը Ռումինիայում Եվրամիության ոչ պաշտոնական գագաթնաժողովից առաջ լրագրողներին ասել է․ - «Իրանը պետք է մնա այս պայմանագրի շրջանակներում, և մենք պետք է անենք ամեն ինչ դա ապահովելու համար»:
Ֆրանսիայի նախագահը հորդորել է պայմանագիրը ստորագրած կողմերին չսրել իրավիճակը, այլ հակառակը՝ համատեղ վերահսկել բոլորի կոլեկտիվ անվտանգությունը։