Հայաստանի բնակիչները պատրա՞ստ են պոլիկլինիկաներում վճարել
Հայաստանի բնակիչները բժշկական ծառայությունների համար պոլիկլինիկաներ են դիմում փող չունենալու պատճառով, քանի որ դրանք անվճար են, ըստ որում՝ չեն կարծում, որ պոլիկլինիկաներում բուժծառայությունների որակը կբարձրանա, եթե դրանք վճարովի դառնան բարձր եկամուտ ունեցողների համար: Այսպիսին են NEWS.am Medicine-ի անցկացրած հարցման տվյալները:
Մասնավորապես՝ «Արդյոք պատրա՞ստ եք վճարել պոլիկլինիկաներում բուժծառայությունների համար» հարցին, պատասխանողների 53 տոկոսը կամ 555 մարդ նշել է, որ պոլիկլինիկա է դիմում հենց այն պատճառով, որ փող չունի, եւ պատրաստ չէ վճարել: 27 տոկոսը (290 մարդ) պատրաստ է վճարել, բայց ոչ թե պալիկլինիկաներում, այլ հիվանդանոցներում, եւ միայն 20 տոկոսն է (211 մարդ) համաձայն պոլիկլինիկաներում վճարովի ծառայությունների ներդրմանը, քանի որ այդ ծառայությունների համար, միեւնույն է, վճարում է, իհարկե՝ ոչ պաշտոնապես: Այս հարցին պատասխանել է ընդամենը 1056 մարդ:
Ինչ վերաբերում է հարցին՝ արդյոք պոլիկլինիկաներում ծառայությունների մակարդակը կբարձրանա՞, եթե դրանք վճարովի դառնան բարձր եկամուտ ունեցող մարդկանց համար, հարցվածների 61 տոկոսը (702 մարդ) կարծում է, որ դա անօգուտ կլինի, քանի որ բարձր եկամուտ ունեցողները պոլիկլինիկաներ չեն դիմում, իսկ 28 տոկոսը (315 մարդ) կարծում է, որ դա միայն կոռուպցիոն ռիսկերը կմեծացնի: Եվ միայն հարցվածների 7 տոկոսը կամ 83 մարդ է կարծում, որ պոլիկլինիկաները այդ փողը կծախսեն արդիականացման համար, եւս 43 մարդ կամ 4 տոկոսը հարցի պատասպանը չունի: Այս հարցմանը ընդհանուր 1143 մարդ է մասնակցել:
Հիշեցնենք, որ պոլիկլինիկաները մասնակի վճարովի դարձնելու նախաձեռնությունը պատկանում է առողջապահության նախարար Լեւոն Ալթունյանին: 2016 թվականի դեկտեմբերին կայացած մամուլի ասուլիսի ժամանակ նա նշել էր, որ սա նույնիսկ դեռեւս նախագիծ չէ, այլ ընդամենը քննարկվող առաջարկ: Ըստ որում՝ վճարունակության ստորին շեմը որոշելու համար նա առաջարկում էր յուրաքանչյուր մարդու հաշվարկով գրանցել ամսական 250 հազար դրամի եկամուտը:
Առողջապահության պետական գործակալության պետի պաշտոնակատար Ծաղիկ Վարդանկանը 2017-ի մարտին լրագրողների հետ հանդիպման ժամանակ ոլորտում ծրագրվող բարեփոխումները ներկայացնելիս նշել էր, որ պոլիկլինիկաների խնդիրը բարդ է, եւ առաջիկայում հարկ է որոշել, թե դրանք ընդհանրապես ինչ գործառույթներ պետք է կատարեն: Նա նշել էր, որ քննարկվում է պոլիկլինիկաներում համավճարի ներդրման հարցը, ըստ որում՝ գումարը պետք է խորհրդանշական լինի: Քննարկվում է նաեւ որոշակի հիվանդությունների բուժումը հիվանդանոցներից պոլիկլինիկաներ տեղափոխելու հնարավորությունը: «Ոչ մեծ կասկածներ կան բուժական մասով, բայց, այդուհանդերձ, սա թերապեւտիկ հիվանդներից հիվանդանոցները բեռնաթափելու հնարավորություն կտա»,- ասել էր նա: