Թաղապետի վարորդի, էտած-հնձած ծառերի ու ճոխ սեղանի մասին, որն այդպես էլ չհանեցին
hraparak.am-ը գրում է. Արաբկիրի թաղապետարանում երեկվանից կրքեր են եռում։ Մայիսի 2-ին թաղապետարանի կոլեկտիվը հավաքվել է շենքի դահլիճում եւ թաղապետին կանչել հանդիպման։ «Կա՛մ մենք նրան պետք է հանենք, կա՛մ նա՝ մեզ, այլեւս այսպես աշխատել հնարավոր չէ»,- ասում է աշխատակիցներից մեկը։
Ըստ աշխատակիցների, թաղապետն արհամարհում է իրենց, քաղաքացիներին չի ընդունում, իսկ երբ նրան ինչ-որ հարցով դիմում են, պահանջում է բացատրագիր գրել։ Արամ Դանիելյանի սեղանին բացատրագրերի սար է գոյացել։ Ասում են՝ շենքում մարդ չկա, որ բացատրագիր գրած չլինի։ Մի շաբաթ շարունակ գույքահարկի բաժնի աշխատակիցները ցանկացել են հանդիպել թաղապետին․ ապարդյուն։ Անհասկանալի սկզբունքով բաժանվող եռամսյակային պարգեւավճարները եղել են այն վերջին կաթիլը, որը հունից հանել է Արաբկիրի աշխատակիցներին եւ դրդել «բունտի»։ «Ապստամբությունն» ի սկզբանե ծագել է գույքահարկի բաժնում։ «Քաղաքապետն ասել է, որ բոլորիս տան պարգեւավճարներ։ Ուզում ենք հասկանալ՝ ինչո՞ւ է մեկը 30 տոկոս պարգեւավճար ստանում, մյուսը՝ 50։ Ուզում ենք հասկանալ՝ ինչո՞ւ եք դուք 100 տոկոս ստանում, ձեր վարորդը 100 տոկոս պարգեւավճար ստանում, եւ առհասարակ՝ ինչո՞ւ է թաղապետի վարորդը հարստանում։ Ինչո՞ւ չեք քննարկում բաժնի պետերի հետ, ինչո՞ւ է մի բաժնում մեկը 50 տոկոս պարգեւատրվում, մյուս բոլորը՝ 30։ Նա երկուսուկես ժամ խոսեց, ու էդպես էլ չհասկացանք ոչ մի բան»,- ասում է թաղապետարանի բաժնի պետերից մեկը։ Թաղապետի վարորդը՝ Կարեն Գրիգորյանը, Արաբկիրի թաղապետի աներորդին է։ Իր քեռորդուն էլ՝ Հովսեփ Հովսեփյանին, թաղապետ Արամ Դանիելյանը նշանակել է կանաչապատման բաժնի պետ։
Թաղապետարանի աշխատողները, որոնք մեզ են դիմել, վստահեցնում են, որ համայնքապետը «Կանաչապատում» ՓԲԸ նախկին ղեկավարին ազատել է աշխատանքից, եւ երկար ժամանակ ստորաբաժանումը չի ունեցել ղեկավար։ Ի վերջո, ապրիլին նշանակվել է թաղապետի քեռորդին՝ Հովսեփ Հովսեփյանը, որը տապալել է կանաչապատման աշխատանքները։ «Չե՞ք տեսել, թե ինչ է կատարվել Կիեւյան, Բաբայան, մյուս փողոցների ծառերի հետ։ Բողբոջը վրան՝ կտրել-թափել են ճյուղերը։ Հիմա այդ փողոցներում կանաչ տերեւ չես գտնի»։ Կանաչապատման պատասխանատու Հովսեփ Հովսեփյանը չժխտեց, որ ինքը թաղապետի քեռորդին է։ «Ի՞նչ կապ ունի, թե ես ում քեռու որդին եմ»,- ասաց նա՝ վստահեցնելով, որ կանաչապատման գործընթացն իրականացվել է քաղաքապետարանի բնապահպանության վարչության կողմից։
«Վերջին 10 տարում Արաբկիրում չի եղել ոչ մի էտում,- ասաց Հովսեփյանը՝ մի մեծ խաչ քաշելով Կիեւյան փողոցի մոտակայքում ապրողներիս հիշողությունների վրա,- փողոցների եւ բակային հատվածների մասին էլ չեմ խոսում։ Կիեւյան փողոցում կատարվել է ուղղակի ծառերի ձեւավորում եւ խորը էտ, որն ավարտվել է ապրիլի 25-ին։ Քոչար, Նաիրի Զարյան, Բաբայան փողոցներում արել եմ ուղղակի ծառերի սանմաքրում ու ձեւավորում»։ Խոսքն այն մասին է, որ ծառերի էտումը սկսվել է շատ ուշ, երբ Դուք աշխատանքի նշանակվեցիք, ծառերն արդեն բողբոջել էին, եւ դրանց վնաս հասցվեց։ «Ես ընդունվել եմ աշխատանքի ապրիլի սկզբին, մարտից աշխատանքները գնում էին։ Էս ծավալի սանիտարական էտում չի տեսել համայնքը։
Բակային տարածքները չեն մտնում նախահաշվի մեջ, բայց մենք դա էլ ենք արել։ Ունենք 30-40 խնամված բակեր, որոնք նախկինում չէին արվում»,- պատասխանեց Հովսեփյանը, իսկ Արաբկիր համայնքի ջղային բնակիչներից մեկը մեզ լուսանկարներ ուղարկեց, որոնցից ակնհայտ է, թե ինչ անխնա են վարվել ծառերի հետ։
Թաղապետարանի «բունտի» մասին կանաչապատման ընկերության ղեկավարն ասաց․ «Ես տեղյակ չեմ, ես իմ կանաչապատման մասին միայն կարող եմ խոսել։ Կողքից նայելով՝ չեմ նկատել, որ թաղապետը մարդկանց հետ չշփվի։ Իսկ պարգեւավճարների հետ կապված՝ հետեւել եմ ավագանու նիստին, քաղաքապետն ասաց, որ մինչեւ 100 տոկոս պրեմիաներ են տրվում աշխատողներին, բայց դա կախված է աշխատողի գործադրած ջանքերից»։
Տեղեկանքի կարգով՝ Արամ Դանիելյանի մանկությունը, դպրոցական տարիներն անցել են Վայքում, պետական կամ համայնքային որեւէ կառույցում չի աշխատել, իսկ վերջինը եղել է վաճառքի գծով տնօրենի պաշտոնը։ Արաբկիրի թաղապետ է 6 ամիս։ Համայնքապետարանում հիշում են Դանիելյանի առաջին մուտքը համայնքապետարան եւ «Ազատություն» TV-ի պատրաստած ռեպորտաժը։ Դանիելյանին ճոխություն է թվացել սեղանը, եւ նա ասել է, որ հանել է տալու այն։ Ասել է նաեւ, որ ծառայողական մեքենան ճոխություն է, որ այն պետք է ծառայի բոլոր աշխատողներին։ Ո՛չ մեկը, ո՛չ մյուսը չիրականացավ։