Ընտրողների մոտ կար անտեղյակություն գործընթացի նկատմամբ. Արսինե Խանջյան
«Քաղաքացի դիտորդ» նախաձեռնության անդամ, դիտորդ Արսինե Խանջյանը, ամփոփելով այսօր կայացած ԱԺ ընտրությունների արդյունքները, ասաց, որ դիտարկումներ են անցկացրել Գորիսում, Սիսիանում, օրվա վերջում նաև Երևանի Մալաթիա վարչական շրջանում:
Նա, ընդհանրացնելով, ասաց, որ հատկապես կուտակումներ կային բոլոր ընտրատեղամասերում:
«Անտեղյակություն կար, շփոթում գործընթացի նկատմամբ, քվեարկողները հստակ չգիտեին՝ ինչպես օգտագործել ծրարները, թղթիկները, ինչպես օրինակ՝ զինվոր, որ չգիտեր ինչպես օգտագործեր, դուրս էր եկել խցիկից, նորից տվեցին, բայց ընդհանրապես չքվեարկեց»,-ասաց նա:
Արսինե Խանջյանը նշեց, որ շատ էր բաց քվեարկությունը, կար նաև ուղղորդում:
«Ոչ թե ուղեկցում, այլ ուղղորդում էին։ Քվեարկության իրավունքի խախտումներ կային, նաև հանձնաժողովի նախագահի և քարտուղարի կողմնակալ վարք»,-ասաց նա և նշեց, որ տպավորություն կար, որ դիտորդները հուսահատ էին, ազատ լիազորություն չունեին: