Դիմում ԿԸՀ նախագահ Տիգրան Մուկուչյանին
Հարգելի ԶԼՄ ներկայացուցիչներ,
Հարգելի պարոն Մուկուչյան,
Հարգելի պարոն Զոհրաբյան,
Ցանկացած քվեաթերթիկ, որը պարունակում է սահմանված ձևից բացի ցանկացած այլ գրառում, պետք է համարվի անվավեր, քանի որ`
ՀՀ ընտրական օրենսգրքի 69-րդ հոդվածի 1-ին մասի համաձայն` "Ազգային ժողովի ընտրությունների դեպքում սահմանված նմուշի քվեաթերթիկն անվավեր է, եթե ներառում է ավելորդ գրառում":
Ու թեև նույն հոդվածի 3-րդ մասի համաձայն` "Սահմանված ձևի ոչ էական խախտումը չի կարող համարվել քվեաթերթիկի անվավերության հիմք, եթե ընտրողի մտադրությունը հստակ է և աներկբա", այնուամենայնիվ քվեաթերթիկի վրա որևէ գրառում չի կարող համարվել ոչ էական, քանի որ ցանկացած գրառում կարող է արված լինել ընտրողի ինքնությունը բացահայտելու համար:
Հաշվի առնելով վերոնշյալը` քվեաթերթիկի վրա ցանկացած գրառում պետք է դիտարկվի որպես էական, և այդ քվեաթերթիկը համարվի անվավեր:
Խնդրում ենք մինչ քվեաթերթիկների հաշվարկի սկիզբը ՀՀ կենտրոնական ընտրական հանձնաժողովի հրապարակային պաշտոնական արձագանքը վերոնշյալ խնդրի և դրա շուրջ տարամեկնաբանությունների վերաբերյալ:
Հ.Գ. Նշենք, որ նախկին ընտրական օրենսգրքի 68-րդ հոդվածի 1-ին մասի 4-րդ կետի համաձայն քվեաթերթիկը համարվում էր անվավեր, եթե` "բացի քվեարկության համար կենտրոնական ընտրական հանձնաժողովի սահմանած կամ դրան նմանվող նշանից ներառում է այլ` ընտրողի ինքնությունը բացահայտող նշում":