Ինքը շատ փոքր մարդ է, որ ինձ ասի՝ կա´մ քաղաքականությամբ զբաղվի, կա´մ բիզնեսով. Ծառուկյանը՝ «Իմ քայլը» խմբակցության պատգամավորի մասին
Ինքը շատ փոքր մարդ է, որ ինձ ասի՝ կա´մ քաղաքականությամբ զբաղվի, կա´մ բիզնեսով. ապրիլի 24-ին Ծիծեռնակաբերդի հուշահամալիրում լրագրողների հետ զրույցում ասաց ԲՀԿ առաջնորդ Գագիկ Ծառուկյանը՝ պատասխանելով այն հարցին, թե «Իմ քայլը» խմբակցության պատգամավոր Հայկ Գևորգյանը պնդում է, որ «Արարատցեմենտ» գործարանը Ծառուկյանը ձեռք է բերել 200 000 դոլարով, և Ծառուկյանը պետք է որոշի՝ կա´մ քաղաքականությամբ զբաղվել, կա´մ բիզնեսով:
Ծառուկյանն էլ ասաց, որ Հայկ Գևորգյանին խորհուրդ է տալիս, որ գնա և շարունակի զբաղվել լրագրությամբ ու նշեց, որ Հայկ Գևորգյանը ցեմենտի գնի հետ կապված իր տեսակետն է հայտնել: «Ես էլ՝ որպես Ծառուկյան, ասացի , որ եթե այդպես լինի, ես դա նվեր եմ տալիս, բայց Մելքումյանը ներկայացրեց փաստաթղթերով, որ 200 000 դոլարից բացի, միլիոնավոր պարտքեր են փակվել»,-ասաց Ծառուկյանը և նշեց, որ պատգամավորն այդ շանտաժի համար պետք է իրենից ներողություն խնդրի:
«Աշխարհում ամենահաջողակ քաղաքական գործիչները սեփականատերերն են՝ Բեռլուսկոնին, Թրամփը… Մարդիկ պետք է լիարժեք հասկանան՝ ինչ են ասում, և դա ինչ է նշանակում»,- հավելեց նա:
Դիտարկմանը, որ իրենց խմբակցության կարկառուն ներկայացուցիչներից մեկը՝ Նաիրա Զոհրաբյանը, նույնպես լրագրող է եղել, Ծառուկյանը պատասխանեց, թե ինքը չի թերագնահատում: «Բայց եթե միայն լրագրող լինի ամբողջ խորհրդարանում… մարդ պետք է լինի, որ հասկանա տնտեսությունից, կազմակերպելուց, ինչ է պետք մեր ժողովրդին, ինչից է պետք սկսել այսօր, բոլորն էլ սպասում են, ուզում են լավ ապրել, բարիքներից օգտվել, միայն փնովելով չի»,-ասաց նա:
Հարցին, թե վարչապետ Նիկոլ Փաշինյանի հետ հանդիպման ժամանակ ինչ են քննարկել, Ծառուկյանը պատասխանեց, թե կառուցողական քննարկում է եղել, որը վերաբերել է ներդրումներին: «Հիմնական խնդիրը վարչապետին ճիշտ պետք է ներկայացնել, որ կարողանա որոշում կայացնել, թե չէ ամեն հարց վարչապետի վրա գցելով, ինձ ճիշտ հասկացեք, ով ինչ անի, վարչապե՞տը պետք է պատասխան տա»,-ասաց նա:
Հարցին, թե մի առիթով ասել էր, թե գոհ է Փաշինյանից, բայց նրա քաղաքական ուժից գոհ չէ, և թե արդյոք այս մեկ տարում փոփոխություն չկա՞, Ծառուկյանը պատասխանեց. «Ես չեմ ասում փոփոխություն չկա, կան, բայց տնտեսական, սոցիալական փոփոխություն չկա, իսկ հիմնական խնդիրն այն է, որ մարդիկ պատրաստվում են լքել երկիրը»:
Իսկ, թե մեկ տարում հնարավո՞ր էր, ասաց, որ երեք ամսում էլ է հնարավոր: «Ի՞նչ է, մի պուճուր երկիր ունենք, ամենալավ հողերը մենք ունենք, տարածքը արտաքին առևտրի համար՝ ԵԱՏՄ-ի համար և Էմիրատների համար, մեր հողերի 60 տոկոսը չի մշակվում»,-ասաց նա: