Կրկնակի պարգեւատրում՝ կնիք դնելու համար
Հրազդանի քաղաքապետ Սեւակ Միքայելյանը 7 ամիս է, ինչ պաշտոնավարում է: Այս ժամանակահատվածում համայնքում որոշ աշխատանքներ կատարվել են, սակայն ոչ թե համայնքի բյուջեով, այլ Միքայելյանի միջոցներով, քանի որ, ըստ քաղաքապետի, համայնքի բյուջեն դատարկ է: Միքայելյանը համայնքի դատարկ բյուջեով տարեվերջին պարգեւատրեց իրեն, օգնականներին, խորհրդականներին, բաժնի պետերին՝ մեկ աշխատավարձի չափով: Պարզվում է, որ Հրազդանի քաղաքապետարանում կրկնակի պարգեւավճար են ստանում՝ փաստաթղթի վրա կնիք դնելու համար:
Քանի որ Հրազդանի քաղաքապետարանի մամուլի պատասխանատուն զբաղվածության պատճառով ժամանակ չունի մեր հարցերին բանավոր պատասխանել, մենք հարցերը գրավոր ուղարկեցինք:
- 2018թ. տարեվերջին քաղաքապետարանի աշխատակազմը 1 ամսվա աշխատավարձի չափով պարգեւավճարներ ստացավ: Այս 4 ամիսների ընթացքում քաղաքապետարանի աշխատակազմը (կամ համայնքապետարանի որեւէ գլխավոր պաշտոն զբաղեցնող անձը) կրկի՞ն պարգեւավճար ստացել է 1 ամսվա աշխատավարձի չափով: Եթե այո, ապա ո՞ր կատարած աշխատանքի համար:
- Վերջին 4 ամիսների ընթացքում մեկ աշխատավարձի չափով պարգեւատրվել է աշխատակազմի քարտուղարը՝ իր պարտականությունները բարեխղճորեն կատարելու, բացի ՔԿԱԳ բաժնի պետի պաշտոնակատարի պարտականությունները, 2018 թվականի դեկտեմբերի 12-ից մինչեւ 2019 թվականի ապրիլի 4-ը համատեղ կարգով աշխատելու համար, ինչի արդյունքում բյուջեից խնայվել է մոտ 1մլն ՀՀ դրամ:
- Բացի քաղաքապետարանի աշխատակազմից, պարգեւավճարներ ստացել են ՀՈԱԿ-ների տնօրեններն ու աշխատակիցները: Որքա՞ն է կազմել պարգեւավճարների ընդհանուր գումարը:
- Մայրության եւ գեղեցկության տոնի առթիվ պարգեւատրվել են «Մաքուր Հրազդան» ՀՈԱԿ-ի 25 աշխատակիցներ՝ մաքրուհիներ, յուրաքանչյուրը 15000-ական դրամով: Պարգեւատրման ընդհանուր գումարը կազմել է 375 ՀՀ դրամ:
- Համայնքապետարանի աշխատակազմում քանի՞ հայեցողական պաշտոններ կան:
- Համայնքապետարանի աշխատակազմում հայեցողական պաշտոնների վերաբերյալ վերջին ամիսների ընթացքում Ձեր կողմից իսկ բանավոր կերպով հարցում իրականացվել է եւ տրվել է պատշաճ պատասխան:
-100 օրը լրանալուց հետո քաղաքապետը լռեց: Ե՞րբ տեղի կունենա քաղաքապետ Սեւակ Միքայելյանի մամուլի ասուլիսը:
-100 օրը ասվածը օրենքով ամրագրված չի: Համայնքի ղեկավարը պարբերաբար համայնքում իրականացված աշխատանքները հանրայնացնում է իր ֆեյսբուքյան եւ համայնքապետարանի պաշտոնական կայքի միջոցով: Մամուլի ասուլիսի վերաբերյալ այս պահին հստակ ոչինչ ասել չենք կարող:
Հ.Գ. Ստացվում է, որ Հրազդանի նորընտիր քաղաքապետը նախորդինի պես խուսափում է մամուլի ասուլիսով հանդես գալ եւ հարցերին սկսում է գրավոր ձեւով պատասախանել, իսկ գրավոր հարցերն ու դեմ առ դեմ հարց ու պատասխանը միանգամայն տարբեր բաներ են: Քաղաքապետարանի մամուլի պատասխանատուն էլ՝ թող չսահմանափակվի քաղաքապետի որեւէ աշխատանքի մասին լուրեր տարածելով, այլ ալարի բանավորից բացի, հարցին գրավոր պատասխանել: