Թուրքիայի իշխանությունները թույլ չեն տա Ս-400-ի պատճառով հարցականի տակ դնել ՆԱՏՕ-ին իր անդամակցությունը
Անկարան թույլ չի տա հարցականի տակ դնել ՆԱՏՕ-ին Թուրքիայի անդամակցությունը: Այս մասին «Անատոլիական» գործակալության հետ հարցազրույցում ասել է Թուրքիայի նախագահի մամուլի քարտուղար Իբրահիմ Քալընը:
Նրա խոսքով՝ Անկարան անընդունելի է համարում, որ որեւէ մեկը քննարկի ՆԱՏՕ-ից Թուրքիային բացառելու հարցը ռուսական Ս-400 ԶՀՀ-ների ձեռքբերման կամ F-35 կործանիչների կառուցման ծրագրերի ենթատեքստում:
«Թուրքիան ՆԱՏՕ-ի լիիրավ անդամ է եւ դաշինքի ցանկացած որոշման ժամանակ ձայնի իրավունք ունի»,- ասել է Քալընը:
Մամուլի քարտուղարի խոսքով՝ Անկարայի եւ Վաշինգտոնի հաաբերությունները դժվար ժամանակաշրջան են ապրում՝ կապված շատ հարցերով տարաձայնությունների հետ: «Դա վերաբերում է ոչ միայն Ս-400-ի պայմանագրին կամ F-35 օդանավերի մատակարարումներին: Կողմերի դիրքորոշումները տարբերվում են նաեւ սիրիական կարգավորման եւ Ֆեթուլլահ Գյուլենի ահաբեկչական ուղղության դեմ պայքարի համատեքստում»,- ասել է Քալընը:
Մամուլի քարտուղարը հիշեցրել է, որ Թուրքիայի եւ ԱՄՆ հարաբերությունները խոր արմատներ ունեն:
«Երկու երկրների երկխոսության մեջ հիմնական խնդիրները կապված են YPG/PKK ահաբեկիչներին Վաշինգտոնի աջակցության եւ Գյուլենին Թուրքիային հանձնելու գործընթացի ձգձգման հետ»,- ասել է Քալընը:
Նրա խոսքով՝ Թուրքիան, որպես ՆԱՏՕ-ի անդամ, կշարունակի դաշինքում իր դիրքերն ամրապնդել:
Թուրքիան անցկացնում է բազմավեկտոր արտաքին քաղաքականություն եւ ուղղորդված է ՆԱՏՕ-ի մեջ չմտնող երկրների հետ համագործակցության զարգացմանը, ասել է մամուլի քարտուղարը:
«Թուրքիայի համար Ռուսաստանի հետ հարաբերությունները այլընտրանք չեն ԱՄՆ-ի եւ ԵՄ-ի հետ երկխոսությանը: Ճիշտ այդպես՝ Արեւմուտքի հետ հարաբերությունները այլընտրանք չեն Ռուսաստանի հետ կապերին: Փաստարկներ են բերվում այն բանի օգտին, որ Թուրքիայում Ս-400-ների տեղակայումը սպառնալիք կդառնա F-35-ի շուրջ պայմանագրին: Այս պատճառով Անակարան առաջարկել է ՆԱՏՕ-ի հովանու ներքո տեխնիկական կոմիտե ստեղծել: Այդ կոմիտեն անհրաժեշտ աշխատանք կկատարի: Թուրքիան ԱՄՆ-ից այս առաջարկի պատասխանին է սպասում»,- հավելել է Քալընը: