«Հայաստանը պետք է ընտելանա. ռուսական էժան գազի ժամանակաշրջանը մոտենում է ավարտին»
«Գազպրոմ Արմենիա» ընկերությունում ցավագին կրճատումներ են սպասվում. շուտով միջին 227 000 դրամ աշխատավարձով մոտ 6000 աշխատակից ունեցող ընկերությունը կկրճատի տեսուչների 50, փականագործների 30 և կենտրոնական ապարատի աշխատակիցների 10%-ին: Այս մասին «Վերելք»-ին հայտնել են ռուսական «Գազպրոմ»-ի դուստր ընկերության՝ «Գազպրոմ Արմենիա»-ի աղբյուրները, որոնց փոխանցմամբ՝ դա արվելու է սպառողների համար գազի սակագինն անփոփոխ թողնելու նպատակով:
Նրանք մանրամասնել են, որ տարեսկզբին սահմանին ռուսական գազի գինը թանկացել է 15 դոլարով (150-ից դարձել է 165 դոլար), սակայն «Գազպրոմ Արմենիա»-ի անձնակազմի կրճատման արդյունքում հնարավոր կլինի սպառողների համար գազի գինն անփոփոխ թողնել:
ՀՀ իշխանությունների փոխանցմամբ՝ ռուսական կողմի և «Գազպրոմ Արմենիա»-ի հետ բանակցությունները շարունակվում են: Իշխանությունները պնդում են, որ գնի բարձրացումը պետք է փոխհատուցվի ընկերության միջոցների հաշվին: «Գազպրոմ Արմենիա»-ն դրան ի պատասխան հայտնել է սպասվելիք կրճատումների մասին:
Աղբյուրները նշել են, որ մի քանի օրվա ընթացքում տեսուչներն ու փականագործներն աշխատանքից հեռացման ծանուցում կստանան:
«Սա բավականին տագնապալի ազդակ է, քանի որ ընկերությունը կրճատում է ամենացածր օղակի աշխատակիցներին, որոնք իրենց աշխատանքով ապահովում են երկրի գազատրանսպորտային համակարգի կայուն աշխատանքը: Նրանց հեռացումը կարող է համակարգի ընդհանուր անվտանգության համար խնդիրներ ստեղծել»,- ասել է աղբյուրներից մեկը՝ ընդգծելով, որ ՀՀ վարչապետ Նիկոլ Փաշինյանն այս աշխատատեղերի կրճատման հարցում սխալ դատողություններ է անում:
Այնուհետև մեջբերվում է վարչապետի հայտարարությունն այն մասին, որ սպասվող կրճատումներն այդքան էլ չեն հուզում կառավարությանը, քանի որ կրճատվում են «նախկին իշխանությունների կողմից ի սկզբանե քաղաքական նկատառումներով ստեղծված, ոչ արդյունավետ աշխատատեղեր»:
Աղբյուրների համոզմամբ՝ այս հարցում Փաշինյանին մոլորության մեջ են գցել: «Գազպրոմ Արմենիա»-ում ահռելի աշխատավարձեր ստացող և կենտրոնական ապարատում «ոչինչ չանող» աշխատակիցներ, իհարկե, կան, սակայն նրանք շարունակելու են ապագայում էլ աշխատել, մինչդեռ աշխատանքը կորցնելու են ամենացածր օղակի ներկայացուցիչները:
Ներկայում ՀՀ կառավարությունը բանակցում է ռուսական կողմի հետ, որպեսզի գազի վերջնական գնի շուրջ պայմանավորվածություն ձեռք բերվի: ՀՀ իշխանությունները ցանկանում են «Գազպրոմ»-ի հետ գազի գնի վերաբերյալ համաձայնագրի 5-ամյա ձևաչափին անցում կատարել: Ներկայում ստորագրված է միայն գազի մատակարարումը մեկ տարով երկարաձգելու վերաբերյալ ժամանակավոր արձանագրություն:
Իսկ մինչ այդ փորձագետները նշում են, որ Հայաստանը պետք է ընտելանա գազային հատվածում Ռուսաստանի հետ հարաբերությունների նոր իրականությանը:
«Գազի գնի՝ 15 դոլարով վերջին թանկացումը վկայում է այն մասին, որ Հայաստանի համար ռուսական գազի բացառիկ գնի ժամանակաշրջանն ավարտվում է: Հիմա իրավիճակն այլ է, և դրան պետք է ընտելանալ»,-ասել է էներգետիկ հարցերով փորձագետ Արա Մարջանյանը: