«Ազգովի կանգնելու ենք քվեախցիկի և մեր խղճի առջև»
Շիրակի մարզի հարգելի՛ ընտրողներ,
Ահա և ավարտին է մոտենում ապրիլի 2-ին կայանալիք Ազգային ժողովի ընտրությունների քարոզարշավը, և մենք ազգովի կանգնելու ենք քվեախցիկի և մեր խղճի առջև:
Խոստումներ որքան ասեք՝ լսեցիք: Ես` մեկը ձեզնից, հասկանում եմ, թե որքան դժվար է հավատալ և ճիշտ կողմնորոշվել: Սակայն առանց հույսի, լավատեսության և հավատի դժվար է ապրել: Մտորեք մի պահ և աշխատեք, որ հույսն ու հավատը առանց իրատեսության չմոլորեցնի ձեզ:
Եղեք համարձակ և ազնիվ, մի՛ վախեցեք ոչնչից և ոչ մեկից. այդ մենք ենք կախված ձեր քվեից, և մենք ենք ակնկալում Ձեր օգնությունը: Ոչ ոք չի կարող վերահսկել ձեր ազատությունը: Ընտրեք իրատեսականը, մարդկային փորձառությունն ու անկաշառությունը: Սա մեր բոլորի ընտրությունն է, և մենք սխալվելու իրավունք չունենք:
Ես իմ կողմից աշխատել եմ լինել ազնիվ, անիրականանալի և սին խոստումներ չտալ, ներկայացրել եմ իրատեսական, իմ ուժերին և փորձառությանը համահունչ ծրագրեր: Կհավատա՞ք ինձ, կպարտավորեցնեք իրագործել մեր դաշինքի, մեր թիմի ծրագրերը, որոնք մշակվել են հանգամանորեն, այսօրվա ռեալ հնարավորությունների սահմաններում:
«Օհանյան–Րաֆֆի–Օսկանյան» դաշինքից պատգամավորության թեկնածու Հովհաննես Ասոյանի ֆեյսբուքյան էջից