Լեռնային Ղարաբաղը մեզ համար «գորշ գոտի» է. Յագլանդ
Վարչապետ Նիկոլ Փաշինյանը Ստրասբուրգ կատարած աշխատանքային այցի շրջանակում այսօր հանդիպել է Եվրոպայի խորհրդի գլխավոր քարտուղար Թորբյորն Յագլանդի հետ: Հանդիպումից հետո ՀՀ վարչապետն ու ԵԽ գլխավոր քարտուղարը պատասխանել են լրագրողների հարցերին: Յագլանդին հարց է տրվել «գորշ գոտիներ» այցելելու խոչընդոտների վերաբերյալ:
«Անընդունելի է, որ Եվրոպայի խորհրդի ընթացաստուգող մարմինները և մարդու իրավունքների հանձնաժողովները չեն կարողանում աշխատել Եվրոպայի տարածքում գտնվող որոշակի հատվածներում, այսպես կոչված՝ «գորշ գոտիներում»: Լեռնային Ղաբարաղը մեզ համար այդպիսի «գորշ գոտի» է, որովհետև մենք չենք կարողանում աշխատել այնտեղ, որովհետև այն շրջափակված է: Իմ առաջարկն է մանդատ ստանալ, որպեսզի մարդու իրավունքների հանձնակատարը իրավունք ստանա՝ գնալու այնտեղ, որտեղ հարկավոր է: Սա պետք է ամրագրվի Եվրոպայի կառավարությունների կողմից քաղաքական հայտարարությամբ», – ասել է Յագլանդը:
ԵԽ գլխավոր քարտուղարը նաև հավելել է, որ ավելի լավ կլիներ, որ այս ամենը հնարավոր լիներ անել նաև ընթացաստուգող մարմինների համար, սակայն կարելի է սկսել մարդու իրավունքների հանձնակատարից:
«Հանձնակատարի աշխատանքը չպետք է ազդի այս հատվածների կարգավիճակի մասին տեսակետների վրա: Նա կատարում է միայն մարդասիրական աշխատանք և վերջ: Դա պետք է հենց այդպես էլ ընկալվի», – շեշտել է Յագլանդը: