Լեհաստանում ուսուցիչներն անժամկետ գործադուլ են հայտարարել
Լեհ ուսուցիչներն անժամկետ գործադուլ են հայտարարել՝ սպառնալիքի տակ դնելով քննությունների անցկացումը, փոխանցում է «ՌԻԱ Նովոստի»-ն:
Երկուշաբթի երկրի շատ դպրոցներում ուսուցիչները չեն աշխատել: Նախկինում անցկացված հանրաքվեի արդյունքները վկայում են այն մասին, որ գործադուլին մասնակցելու պատարաստակամություն են հայտնել դպրոցների 79 տոկոսի մանկավարժները:
Ուսուցիչների հիմնական պահանջն է աշխատավարձի բարձրացումը ամսական հազար զլոտիով (մոտ 263 դոլար):
Կառավարությունը մի քանի շաբաթ բվանակցություններ էր վարում ուսուցիչների պրոֆմիության հետ: Բանակցությունները ղեկավարում էր փոխվարչապետ Բեատա Շիդլոն: Կառավարության կողմն առաջարկում էր ուսուցիչների աշխատավարձի բարձրացման տարբեր տարբերակներ: Կիրակի երեկոյան հաջողվել է փոխըմբռնման հասնել արհմիութենական կազմակերպությունների մի մասի հետ, սակայն խոշորագույն Լեհ ուսուցիչների միությունը եւ Արհմիությունների ֆորումը կառավարության պայմաններին չեն համաձայնվել՝ որոշելով գործադուլ սկսել:
Վարշավայում գործադուլի ազդեցությունն իրենց վրա կարող են զգալ 200 հազար երեխաներ: Սպասվում է, որ երկուշաբթի ամբողջությամբ կփակվեն ավելի քան 150 մանկապարտեզներ, 100 տարրական դպրոցներ եւ մոտ 30 վարժարաններ:
Սրա հետ կապված Վարշավայի իշխանությունները գործատուներին խնդրել են այնտեղ, որտեղ հնարավորություն կա, թույլ տան աշխատակիցներին աշխատանքի ներկայանալ երեխաների հետ:
Ավելի քան 170 դպրոցներ եւ այլ կրթական հաստատություններ հայտարարել են, որ կարող են ծայրահեղ դեպքում երեխաների մասնակի խնամակալություն ապահովել, բայց ոչ ուսումնական դասեր:
Իրավիճակը բարդանում է այն հանգամանքով, որ գործադուլի մեկնարկից մի քանի օր հետո պետք է սկսվեն դպրոցական քննությունները, որոնք նախատեսված են ապրիլի 10, 11, 12, 15, 16 եւ 17-ին:
Սրա հետ կապված ամբողջ երկրում ուսուցիչների են որոնում, որոնք պատրաստ են քննությունների ժամանակ աշխատել: Յուրաքանչյուր վոյեվոդում կրթության տեղական վարչությունները մանկավարժական կրթությամբ մարդկանց դիմումներ են ընդունում: Անցյալ շաբաթ ազգային կրթության նախարար Աննա Զալեւսկայան հրաման էր ստորագրել, որի համաձայն քննական եւ դիտորդական հանձնաժողովների անդամ կարող է լինել մանկավարժական որակավորում ունեցող յուրաքանչյուր մարդ: